સવાલ દવાની ગુણવત્તાનો.. સવાલ દેશની આબરૂનો

હમણાં આફ્રિકા-એશિયાના બે દેશમાં બન્યું એમ ભારતીય કંપની નિર્મિત સિરપ પીધા પછી કુલ એકસો જેટલાં બાળકો મૃત્યુ પામ્યાં હોવાનું બહાર આવ્યું

- 

વૈશ્વિક દવા ઉદ્યોગમાં ભારતનું નામ માનભેર લેવામાં આવે છે. વર્ષે દહાડે દુનિયાભરમાં જે દવા વેચાય છે એમાંથી ત્રીજા ભાગની કોઈ ને કોઈ ભારતીય કંપની દ્વારા બની હોય છે. અલબત્ત, મૂલ્યની દૃષ્ટિએ દવાબજારમાં ભારતનો ક્રમ પહેલા દસમાં પણ આવતો નથી.

એનું એક કારણ એ પણ છે કે મોટા ભાગની ભારતીય કંપનીઓ ઘરઆંગણે અને એશિયા અને આફ્રિકાના પ્રમાણમાં ગરીબ દેશોને ગણતરીમાં રાખી દવા બનાવે છે. યુરોપના દેશો, અમેરિકા કે જપાનમાં ભારતીય ઔષધિઓની ગુણવત્તા સામે હજી શંકાની નજરે જોવામાં આવે છે. ત્યાંની બજારોમાં મોટા પાયે પગપેસારો કરવાનું ભારત માટે હજી શક્ય બન્યું નથી. અમેરિકાની ઔષધિ ઉત્પાદક કંપનીઓની યંત્રણા પર ધ્યાન રાખતી એજન્સી પ્રમાણિત સૌથી વધુ ફાર્માસ્યુટિકલ એકમો ભારતનાં હોવા છતાં આપણી દવા ઊતરતી કક્ષાની ગણાય છે.