કહી દો જીભને કે.. શિયાળો આવ્યો છે!

ગુજરાતી એટલે ખાઈ-પીને જલસો કરવાવાળી પ્રજા. આપણી ખાસિયત એ કે દરેક ઋતુની સ્પેશિયલ વાનગીઓ આપણી પાસે છે. શિયાળાની વાત કરીએ તો આ સીઝનમાં હેલ્ધી નાસ્તો કચ્છી બાજરીની રણકલીથી લઈને બાજરીનાં ચમચમિયાં, મેથીના લાડુ, દક્ષિણ ગુજરાતનું ઊંબાડિયું, ઘીમાં લથબથ પૌષ્ટિક અડદિયાં, એવું જ પૌષ્ટિક કચરિયું અને એવી તો કંઈકેટલીય વાનગી આરોગવાની મજા છે. આવી જ એક વાનગી એટલે ઘૂટો.. અને બાય ડિફૉલ્ટ બની ગયેલો લોચો આમ તો નાસ્તામાં ખવાય છે, પણ શિયાળાની ઠંડી રાતે ગરમાગરમ નાઈટ લોચો પણ ધૂમ ખવાય છે. ચાલો, તો લઈએ મોજ આ બે મજેદાર પકવાનની.

- દેવેન્દ્ર જાની (રાજકોટ)

ઘૂટાની સાથે બાજરાના રોટલા, માખણ, છાશ અને લીલી ડુંગળી મળે તો મોજ્જા હી મોજ્જા!

ઘૂટો મળે તો કંઈ નો ઘટે..

મસ્તમજાની શિયાળાની ટાઢમાં શિયાળામાં જો તમે સૌરાષ્ટ્ર બાજુ જાઓ ને કોઈ કહે કે હાલો હાલો, આજ તો છૂટો થઈ જાય.. તો મૂંઝાતા નહીં.

સૌરાષ્ટ્રના ગાંઠિયા, ચેવડો અને ચટણી તો ફેમસ છે જ, પણ આ છૂટો વળી શું? એવો સવાલ જરૂર થાય. તો જાણી લો કે છૂટો એ ખાસ કરીને શિયાળામાં ખવાતા એવા એક વ્યંજનનું નામ છે, જે ગરમાગરમ તમારી ડિશમાં પીરસવામાં આવે અને તમે હજી તો કોળિયો ભરો એટલે મોંમાંથી ઉદ્ગાર સરી પડેઃ વાહ, આજે તો મોજ પડી ગઈ!

આ સીઝનમાં લીલાં શાકભાજી આસાનીથી અને અઢળક વરાઈટીમાં ઉપલબ્ધ હોય છે એટલે ઓછી મહેનતે તેલ અને ગરમ મસાલા વિનાનો, પોષક તત્ત્વોથી ભરપૂર ઘૂટો છેલ્લા થોડા સમયથી સૌરાષ્ટ્રમાં પ્રચલિત થયો છે. કૉલેસ્ટરોલની કે ફૅટની ચિંતા કર્યા વગર પેટ ભરીને ટો ખાઈ શકાય છે, કારણ કે એમાં કોઈ જ જાતનાં તેલ, મરી-મસાલાનો ઉપયોગ કરવામાં આવતો નથી. અરે, એમાં તો વઘાર સુદ્ધાં થતો નથી. ફક્ત હોય ૩૫થી ૪૦ પ્રકારનાં શાકભાજી.