અનોખી ત્રિપુટી નિવૃત્ત થાય છે..

ધક્કો મારીને કોઈ કાઢે એના કરતાં ખેલદિલીપૂર્વક જાતે જ ખસી જનારા સફળ ખેલાડી બહુ ઓછા હોય છે

- તનીશા

ઉંમર થાય તો ભલભલા ચમરબંધીએ રિટાયર થવું જ પડે. ધક્કો મારીને કોઈ કાઢે એના કરતાં ખેલદિલીપૂર્વક જાતે જ ખસી જનારા સફળ ખેલાડી બહુ ઓછા હોય છે. હમણાં રમતની દુનિયાએ આવી ત્રણ મોટી રિટાયરમેન્ટ જોઈ. અવ્વલ નંબરના ટેનિસસ્ટાર રોજર ફેડરર અને સેરેના વિલિયમ્સ છેલ્લી મૅચ રમીને નિવૃત્ત થયાં તો સૌથી વધુ ઝડપે બૉલ ફેંકવા પંકાયેલી ભારતની જુલન ગોસ્વામીએ પણ આખરી મૅચમાં રમીને બૅટ-બૉલ પૅક કરી દીધાં.

આ ત્રણેય પર્સનાલિટીએ ખેલજગતમાં બોલાવેલા સપાટાવિષયક તમામ આંકડા છાપાં-ટીવી ઈન્ટરનેટમાં બધે પ્રકાશિત થઈ ચૂક્યા છે એટલે તનીશા સ્કોર કાર્ડની લપમાં પડ્યા વિના અહીં આ પ્રતિભાઓ વિશેની થોડી ઓછી જાણીતી તડફડ માહિતી આપે છે, જેમ કે રોજર, સેરેના અને જુલને રમતને વીસથી વધુ વર્ષ આપ્યાં. રોજર ફેડરર અને સેરેના વિલિયમ્સ બન્ને કારકિર્દીની છેલ્લી મૅચ હારી ગયાં, પણ જુલન ગોસ્વામી જીતીને વિદાય થઈ. રોજર અને સેરેના અનેક સ્પર્ધાઓમાં સાથે રમેલાં. એમાં પુરુષ વિભાગમાં રોજર જીત્યો હોય તો મહિલાઓમાં સેરેના એવું ૧૦ વાર બન્યું છે.