માતૃભાષાએ ધારદાર બનાવી સમજણશક્તિ.. હાર્દિક ભટ્ટ શિકાગો

બે દાયકા કરતાં વધુ સમયથી અમેરિકામાં વસતા તથા ઓરેકલ, સિસ્કો એમેઝોનથી લઈને શિકાગો શહેરના ચીફ ઈન્ફોર્મેશન ઑફિસર રહી ચૂકેલા હાર્દિકભાઈ માતૃભાષામાં ભણતરના ફાયદા વર્ણવે છે.

- 

અમેરિકાના પૂર્વ પ્રમુખ બરાક ઓબામા જે રાજ્યમાંથી આવે છે એ ઈલિનોયના શિકાગોમાં વસતા તથા એસડીઆઈ પ્રેઝન્સ એલએલસીના પ્રેસિડન્ટ તથા ચીફ ગ્રોથ ઑફિસર હાર્દિક ભટ્ટનો માતૃભાષા સાથેનો સંબંધ નોખો-અનોખો છે. ચંદ્રિકા અને વિનયકાંત શિવપ્રસાદ ભટ્ટના ઘરે જન્મેલા હાર્દિક માટે ભણતર-ઘડતરનાં વર્ષોમાં ઘાટ ઘાટનાં પાણી પીવા જેવો ઘાટ હતો. હાર્દિકના પિતા વિનયકાંત ભટ્ટ ગુજરાત હાઈ કોર્ટના ડિસ્ટ્રિક્ટ જજ હતા. વડા પ્રધાન નરેન્દ્ર મોદી ગુજરાતના મુખ્ય પ્રધાન હતા ત્યારે લૉ સેક્રેટરી જેવા પદ પર રહી ચૂકેલા વિનયકાંતભાઈની સતત બદલી થયા કરતી.

બાહોશ આઈટી પ્રોફેશનલ હાર્દિક કહે છે: ‘મેં અને મારા ભાઈ, અમદાવાદના નામાંકિત પીડિયાટ્રિશિયન ડૉ. નિશ્ચલ ભટ્ટે અમરેલી, કોડીનાર, પાટણ, વડોદરા, પાદરાથી લઈને ભાવનગર, સુરેન્દ્રનગર, ગાંધીનગર જેવાં આઠ શહેરની આઠ શાળામાં અભ્યાસ કર્યો. એ ઉમેરે છે કે વિવિધ બોલીવાળાં શહેરોમાં જવાનો ફાયદો એ થયો કે મારી ગ્રહણશક્તિ તેજ થઈ, જે મને અમેરિકન ઈંગ્લિશ પકડવામાં મદદરૂપ થઈ.