રાષ્ટ્રીય રમતોત્સવનું યજમાન બનશે ગુજરાત

છ શહેરમાં યોજાનારી ૩૪ સ્પોર્ટ્સ ઈવેન્ટ્સમાં ભાગ લેશે દેશના કુલ ૭૦૦૦ ખેલાડી.

- 

અમદાવાદનું નવનિર્મિત સ્ટેડિયમ રાષ્ટ્રીય રમતોત્સવનું મુખ્ય કેન્દ્ર હશે.

૩૬નો આંક ઘણાને અપશુકનિયાળ, વિખવાદી કે અસહકારસૂચક લાગે. જો કે ગુજરાતને આવનારા સમયમાં ૩૬નો આંક ચોક્કસ ફળશે એમ લાગે છે, કારણ કે ગુજરાતમાં સૌપ્રથમ વાર રાષ્ટ્રીય રમતોત્સવ યોજાવાનો છે. એ હશે ૩૬મો રાષ્ટ્રીય રમતોત્સવ.

પાછલા સમયમાં ગુજરાતમાં રાષ્ટ્રીય સ્તરનાં વ્યાપાર, શિક્ષણ, કળા, હસ્તકળા, સંસ્કૃતિ, વગેરેનાં સફળ આયોજન થયાં. હવે ૨૭ સપ્ટેમ્બરથી ૧૦ ઑક્ટોબર સુધી એકસાથે છ શહેરમાં ૩૪ જેટલી રમતોનો ૩૬મો રાષ્ટ્રીય રમતોત્સવ યોજાશે.

પાંત્રીસમો રમતોત્સવ સાત વર્ષ પહેલાં એટલે કે ૨૦૧૫માં કેરળમાં યોજાયો હતો. પછી કોરોના રોગચાળા સહિતનાં કારણોથી રમતોત્સવ યોજી શકાયો નહોતો.