ચરોતરની મીઠાઈ અને ફરસાણથી મોહિત એનઆરઆઈ

દરેક પ્રદેશની ખાસ વાનગીઓ ત્યાંના રહેવાસીઓને વિશેષ વહાલી હોય છે. ચરોતરમાં કેટલીક મીઠાઈ અને ફરસાણ તો એટલા લોકપ્રિય છે કે આ પંથકમાંથી જઈને વિદેશમાં વસી ગયેલા લોકોની જીભમાંથી પણ એનો સ્વાદ જતો નથી.

- શૈલેષ રાઠોડ

ગુજરાતી પ્રજા સ્વાદરસિક છે, અહીં લોકો ખાવાના શોખીન હોવાના કારણે વિવિધ સ્થળોની અનેક સ્વાદિષ્ટ ચીજ-વસ્તુઓ દેશ-વિદેશમાં પ્રખ્યાત બની છે. દેશમાં જ નહીં, સીમા પાર વિદેશમાં પણ તહેવારો-પ્રસંગોની ખુશીઓમાં સામેલ થતી ખંભાતની સૂતરફેણી-હલવાસન, સૂકા ભજિયા, નડિયાદનું ભૂસુંએ વર્ષોથી પરંપરા જાળવી છે.

આણંદ 'ને ખેડા જિલ્લાના ચરોતર તરીકે ઓળખાતા પંથકના આશરે સાઠ ટકા પરિવારના સભ્યો વિદેશમાં સ્થાયી થયા છે. જેઓ દર શિયાળામાં વૅકેશન ગાળવા વતનની વાટ પકડે છે. અહીં તેઓ દીકરા-દીકરીઓનાં લગ્ન સહિતના કૌટુંબિક કાર્યક્રમો આટોપે છે. એક અંદાજ મુજબ આ ત્રણ માસની સિઝનમાં બે હજારથી વધુ લગ્નો યોજાય છે, એમાંથી ૬૦૦ જેટલાં લગ્ન એનઆરઆઈ પરિવારમાં થાય છે. આ ઉત્સવ વચ્ચે ફોરેનમાં ફિક્કો આહાર ખાઈને કંટાળેલા ચરોતરવાસીઓ વતનના જાતભાતનાં પકવાન આરોગવાનો આનંદ માણે છે. બાદમાં તેઓ જ્યારે પરત પરદેશ જાય ત્યારે પણ આ પ્રદેશની ખાસ ગણાતી વાનગીઓ પણ સાથે લઈ જવાનું ભૂલતા નથી.