ചായ്പിൽ തുടങ്ങിയ ചിപ്സ് നിർമാണം ഇന്ന് വിറ്റുവരവ് 11 കോടി

അറുപതോളം വെറൈറ്റി ചികളും സ്നാക്സുകളും നിർമിച്ച് കയറ്റുമതി ചെയ്യുന്ന സംരംഭം കർഷകർക്ക് കൈത്താങ്ങാകുന്നതിനൊപ്പം 40 പേർക്ക് തൊഴിലും ഉറപ്പാക്കുന്നു.

- 

30 വർഷമായി ഉൽപാദന വിതരണരംഗത്തു പ്രവർത്തിക്കുന്ന ഒരു പ്രവാസി സംരംഭകന്റെ കഥയാണിത്. വീട്ടിലെ ചായ്പിൽ നിന്നായിരുന്നു ഷിഹാബ് വലിയകത്ത് എന്ന സംരംഭകന്റെ തുടക്കം. ഇന്ന് സ്വദേശത്തും വിദേശത്തും ഉൾപ്പെടെ കോടികളുടെ ബിസിനസ്, അറുപതിൽപരം ഉൽപന്നങ്ങൾ, 40 ജീവനക്കാർ എന്ന നിലയിൽ ഷിഹാബിന്റെ 'Taste One' വളർന്നു. പാലക്കാട് വടക്കാഞ്ചേരി ഉൾപ്പെടെ നാലു കേന്ദ്രങ്ങളിലാണ് ഉൽപാദനം നടക്കുന്നത്.

എന്താണു ബിസിനസ്?

 അറുപതോളം വെറൈറ്റി ചികളും സ്നാക്സുകളുമാണ് ടേസ്റ്റ് വൺ നിർമിച്ചു വിൽക്കുന്നത്. രാജ്യാന്തര നിലവാരത്തിലുള്ള ഫ്ലേവറുകൾ ചേർത്താണ് ഉൽപാദനം.

കപ്പ, ചക്ക, ഏത്തക്കായ, ചേമ്പ്, ചേന, മധുരക്കിഴങ്ങ്, ബീറ്റ്റൂട്ട്, ഉരുളക്കിഴങ്ങ്, റോബസ്റ്റ,പാവക്ക, കടച്ചക്ക, കാരറ്റ് എന്നിങ്ങനെ നീളുന്നു ചികളുടെ നിര. ഇവ തന്നെ ഒട്ടനവധി ഷേപ്പിലും ഫ്ലേവറുകളിലും ലഭ്യമാണ്. അരി,റാഗി, കടലമാവ്, ഉഴുന്ന് എന്നിവയിൽ നിർമിക്കുന്ന മുറുക്ക്, മിക്ചർ, പക്കാവട തുടങ്ങിയ സ്നാക്സ് ഐറ്റംസുമുണ്ട്.

വീട്ടിൽ തുടക്കം

 കർഷക കുടുംബത്തിൽ ജനിച്ച ഷിഹാബിന്റെ ബിസിനസ് തുടങ്ങുന്നത് തൃശൂർ തളിക്കുളത്തെ വീട്ടിൽനിന്നാണ്. വീട്ടിലെ ചായ്പിൽ ആവശ്യമായ സൗകര്യങ്ങൾ ഒരുക്കി സാധാരണ ചിപ്സ് ഇനങ്ങൾ ഉണ്ടാക്കി വിൽക്കുകയായിരുന്നു. ക്രമേണ ആവശ്യക്കാർ കൂടിവന്നു.