രോഗ, കീടങ്ങൾക്കെതിരെ ഏലത്തിൽ ജൈവരീതി

മിത്രകുമിളുകളും മിത്ര ബാക്ടീരിയയും ഫലപ്രദം

- ഡോ. രമ്യ ജെ.എസ്., ഡോ. എം. മുരുഗൻ

ഏലത്തിന് ഒട്ടേറെ രോഗ, കീടബാധകൾ ഉണ്ടാകാറുണ്ട്. ഇവയെ നിയന്ത്രിക്കാൻ രാസവസ്തുക്കൾ അമിതമായി പ്രയോഗിക്കുന്ന ശീലവും കർഷകർക്കു പൊതുവെയുണ്ട്. എന്നാൽ, കീട-രോഗബാധ വരുന്നതിനു മുൻപുതന്നെ തോട്ടത്തിൽ ജൈവമാർഗങ്ങൾ അവലംബിക്കുന്നത് ചെടിയുടെ പ്രതിരോധശേഷി വർധിപ്പിക്കുകയും പിന്നീട് കീട രോഗ ആക്രമണമുണ്ടായാൽത്തന്നെ, അവ രൂക്ഷമാവാതിരിക്കുകയും ചെയ്യും. ഈ ജൈവ നിയന്ത്രണ മാർഗങ്ങൾ പരിചയപ്പെടാം.

മെറ്റാറൈസിയം അനൈസോപ്സീയെ പച്ചനിറത്തിലുള്ള മിത്ര കുമിളാണ് മെറ്റാറൈസിയം. അതിനാൽ ഗ്രീൻ മാഡിൻ ഫംഗസ് എന്നും അറിയപ്പെടുന്നു. ഇവ കീട ങ്ങളുടെ ശരീരത്തിനുള്ളിൽ കടന്ന്, ആന്തരികഭാഗങ്ങളെ തിന്നുനശിപ്പിച്ച്, പുറത്തുവരുന്നു. അങ്ങനെ കീടങ്ങൾ പൂർണമായും നശിക്കുന്നു.

ഏലത്തിന്റെ വേരുപുഴുവിനെതിരെ ഫലപ്രദമാണ് മെറ്റാ റൈസിയം. 10 ഗ്രാം ഒരു ലീറ്റർ വെള്ളത്തിൽ എന്ന തോതിൽ മണ്ണ് കുതിരത്തക്ക വിധത്തിൽ ഒഴിച്ചുകൊടുക്കുക. ഒരു ചെടിക്കു കുറഞ്ഞത് 5 ലീറ്റർ. വേരുപുഴുവിന്റെ ആക്രമണം കൂടുതലായ ഏപ്രിൽ-മേയ്, സെപ്റ്റംബർ-ഒക്ടോബർ മാസങ്ങളിൽ ഇത് മണ്ണിൽ ഒഴിച്ചുകൊടുക്കാം.

ലീക്കാനിസില്ലിയം ലീക്കാനി: ഏലത്തിന്റെ വേരുകളെ ആക്രമിക്കുന്ന മീലിമൂട്ടകളെ ഫലപ്രദമായി നിയന്ത്രിക്കാൻ ലീക്കാനിസില്ലിയം ലീക്കാനി എന്ന മിത്രകുമിൾ ഉപയോഗിക്കാം. ഇവ മീലിമൂട്ടകളുടെ ശരീരത്തിൽ കടന്ന് ആന്തരിക ഭാഗങ്ങൾ നശിപ്പിക്കുന്നു. 10 ഗ്രാം ഒരു ലീറ്റർ വെള്ളത്തിൽ എന്ന തോതിൽ കലക്കി, വേരിനോടു ചേരുന്ന ഭാഗത്തെ മണ്ണ് നന്നായി കുതിരുന്ന രീതിയിൽ ഒഴിച്ചുകൊടുക്കാം. ഒരു ചെടിക്ക് കുറഞ്ഞത് 5 ലീറ്റർ.