അധ്വാനം കുറയ്ക്കാൻ ഡ്രോൺ മുതൽ റോബട് വരെ

പറന്നു പണിയും പാടം നോക്കും യന്ത്രപ്പറവ

- ജയിംസ് ജേക്കബ് തുരുത്തുമാലി

നാട്ടിൽ ആദ്യം ട്രാക്ടർ വാങ്ങിയ കൃഷിക്കാരനെ തലമുറകൾക്കുശേഷവും ആളുകൾ ചൂണ്ടിക്കാണിക്കാറുണ്ട്. ട്രാക്ടറിനൊപ്പമോ അതിലേറെയോ പ്രയോജനപ്പെടുന്ന ഡ്രോൺ ആദ്യമായി വാങ്ങിയ കർഷകനും അതേ സ്ഥാനമല്ലേ നൽകേണ്ടത്. ആലപ്പുഴ എടത്വ സ്വദേശി യദുകൃഷ്ണനു കേരളത്തിന്റെ കാർഷിക ചരിത്രത്തിൽ സ്ഥാനം ലഭിക്കുക സംസ്ഥാനത്ത് ആദ്യമായി ഡോൺ സ്വന്തമാക്കിയ കർഷകരിൽ ഒരാളെന്ന നിലയിലാവും. 2 ഡ്രോൺ വില കൊടുത്തു വാങ്ങിയ ഈ മുപ്പത്തിയൊന്നുകാരന് 700 ഏക്കർ പാടത്താണ് നെൽകൃഷി. യദുവിന്റെ പങ്കാളികളായി ജ്യേഷ്ഠൻ പ്രവീൺ  സുഹൃത്തുക്കളായ ഐസക് പേരയിൽ, ജയകുമാർ നെടുമുടി, ടിറ്റോ ജോയി രാമങ്കരി എന്നിവരുമുണ്ട്.

 സൗദിയിലായിരുന്ന യദു തിരികെ നാട്ടിലെത്തിയിട്ടു 4 വർഷം മാത്രം. എന്തിനാണ് തിരിച്ചുപോന്നതെന്നു ചോദിച്ചാൽ ഒരുത്തരം മാത്രം കൃഷി ചെയ്യണം. തുടക്കം 25 ഏക്കറിലായിരുന്നു. വീട്ടുകാരുടെയും സുഹൃത്തുകളുടെയുമൊക്കെ വിമർശനവും പരിഹാസവും ഉണ്ടായെങ്കിലും പ്രമുഖ കർഷകനായ പിതൃസഹോദരൻ ശശിധരൻ പിള്ള മാർഗദർശിയായി കൂടെ നിന്നു. ആദ്യ കൃഷി മികച്ച നേട്ടമായതോടെ ആത്മവിശ്വാസം വർധിച്ചു. കൂടുതൽ സ്ഥലത്തേ ക്കു കൃഷി വ്യാപിപ്പിച്ചു.