ഇന്നസെന്റ് എന്ന എഴുത്തുകാരൻ

ബെസ്റ്റ് സെല്ലറായ എട്ട് പുസ്തകങ്ങൾ രചിച്ച എഴുത്തുകാരനായിരുന്നു ഇന്നസെന്റ്. മാതൃഭൂമി ബുക്സാണ് അദ്ദേഹത്തിന്റെ മുഴുവൻ പുസ്തകങ്ങളും പ്രസിദ്ധീകരിച്ചത്

- നൗഷാദ്

നന്നായി വായിക്കപ്പെടുകയും വിറ്റഴിക്കപ്പെടുകയും ചെയ്യുന്ന പുസ്തകങ്ങൾ എഴുതിയ "ബെസ്റ്റ് സെല്ലർ എഴുത്തുകാരനായിരുന്നു ഇന്നസെന്റ്. എട്ടു പുസ്തകങ്ങൾ ഇന്നസെന്റിന്റേതായി പ്രസിദ്ധീകരിക്കാൻ കഴിഞ്ഞത് പ്രസാധനജീവിതത്തിലെ വലിയ സൗഭാഗ്യവും സന്തോഷവുമായി കാണുന്നു. ഓരോ പുസ്തകത്തിന്റെയും പിറവിയും പ്രകാശനങ്ങളുമെല്ലാം മരിക്കാത്ത ചിരിയൂറുന്ന ഓർമകളായി ഇന്നും മനസ്സിൽ നിറഞ്ഞുനിൽക്കുന്നു.

 2008-ലാണ് ഇന്നസെന്റിന്റെ ആദ്യ പുസ്തകം "ഞാൻ ഇന്നസെന്റ് പ്രസിദ്ധീകരിക്കുന്നത്. മലയാള മനോരമ ആഴ്ച പതിപ്പിൽ പ്രസിദ്ധീകരിച്ചുവന്ന ഓർമക്കുറിപ്പുകൾ "ഞാൻ ഇന്നസെന്റ്' എന്ന പേരിൽ സ്വന്തം കീശയിൽനിന്ന് പൈസ മുടക്കി ഇന്നസെന്റ് തന്നെ പ്രസിദ്ധീകരിക്കുകയായിരുന്നു (കറന്റ് ബുക്സ് കോട്ടയം, 1992). പുതിയ പതിപ്പ് വരാതെ കിടന്ന “ഞാൻ ഇന്നസെന്റും മഴക്കണ്ണാടി' എന്ന പുതിയ കഥകളുടെ സമാഹാരവും ഒലിവ് പബ്ലിക്കേഷനുവേണ്ടിയാണ് ആദ്യം പ്രസിദ്ധീകരിച്ചത്. അതിന് സഹായിച്ചത് ഇന്നസെന്റിന്റെ പ്രിയ സുഹൃത്തും സംവിധായകനുമായ സത്യൻ അന്തിക്കാടാണ്. ശ്രീ കാന്ത് കോട്ടക്കൽ എഴുതിയ അന്തിക്കാട്ടുകാരന്റെ ലോകങ്ങൾ എന്ന പുസ്തകത്തിന്റെ പ്രസിദ്ധീകരണകാലത്താണ് ഇന്നസെ ന്റിനെ കാണുന്നതും സംസാരിക്കുന്നതും.

ഇരിങ്ങാലക്കുട വെച്ച് വലിയ ആഘോഷമായിട്ടായിരുന്നു "ഞാൻ ഇന്നസെന്റും മഴക്കണ്ണാടിയും പ്രകാശനം ചെയ്തത്. മോഹൻലാൽ, സത്യൻ അന്തിക്കാട്, ലോനപ്പൻ നമ്പാടൻ, ഡോ.എം. കെ. മുനീർ തുടങ്ങിയവർ പങ്കെടുത്ത ചടങ്ങിന് വലിയ ആൾക്കൂട്ടം സന്നിഹിതരായിരുന്നു.

2009-ൽ ഞാൻ ഒലിവിൽ നിന്നും മാതൃഭൂമി ബുക്സിലേക്ക് വന്നു. പിന്നീട് പല കാലങ്ങളിലായി ഇന്നസെന്റിന്റെ 6 പുസ്തകങ്ങൾ മാതൃഭൂമി പ്രസിദ്ധീകരിച്ചു. ചിരിക്കു പിന്നിൽ’, ‘കാൻസർ വാർഡിലെ ചിരി’, ‘ഇരിങ്ങാലക്കുടയ്ക്കു ചുറ്റും' "കാലന്റെ ഡൽഹി യാത്ര അന്തിക്കാ ട് വഴി’, ‘ഈ ലോകം അതിലൊരു ഇന്നസെന്റ്', 'Laughing Cancer Away' ("കാൻസർ വാർഡിലെ ചിരി'യുടെ ഇംഗ്ലീഷ് പരിഭാഷ). “ഞാൻ ഇന്നസെന്റിന്റെയും 'മഴക്കണ്ണാടി'യുടെയും പുതിയ പതിപ്പുകൾ മാതൃഭൂമി ബുക്സാണ് പ്രസിദ്ധീകരിച്ചത്.