விவாகரத்து அதிகரிச்சிருக்கு...ஆனா, சமூக கட்டமைப்பு அப்படியேதான் இருக்கு!

சமீபத்தில் நடிகர்கள், இசையமைப்பாளர் நாடறிந்த பிரபலங்களின் விவாகரத்து செய்தி பெரும் பரபரப்பை ஏற்படுத்தியது.

- 'பேராச்சி கண்ணன்

செலிபிரிட்டீஸ் என்பதால் அவர்களின் விவாகரத்து அறிவிப்புகள் ஊடகங்கள் மூலம் பரவலான கவனம் பெற்றுவிடுகின்றன; சமூக வலைத்தளங்களில் வைரலாகின்றன.

ஆனால், சாதாரண தம்பதிகள் விவாகரத்துக் கோரி கோர்ட் படி ஏறி வரும் நிகழ்வுகளும் அதிகரித்துள்ளதாகச் சொல்கின்றனர் நிபுணர்கள்.

இதனால், சிங்கிள் பெற்றிங் என்ற நிலை தமிழ்ச் சமூகத்தில் உயர்ந்து வருவதாகச் சொல்கின்றனர்.

இதற்கு என்ன காரணம்? விவாகரத்து ஏன் அதிகரிக்கிறது என்பது குறித்து துறை சார்ந்தவர்களிடம் பேசினோம்.

முதலில் மூத்த வழக்கறிஞரான கே.சாந்தகுமாரி "முன்பெல்லாம் திருமணம் என்பது புனிதமான பந்தமாக பார்த்தோம். ஆனால் இப்போது திருமண பந்தங்கள், உறவுகள் சம்பந்தமான விஷயங்களில் நிறைய மாற்றங்கள் சிந்தனை ரீதியாக வந்திருக்கின்றன. அதனால் விவாகரத்து கூடுகின்றது..." என்றபடி பேசத் தொடங்கினார்.

"முன்பு அடிச்சாலும் புடிச்சாலும் புருஷன். அவருடன்தான் வாழ்ந்தாகணும். ஏன்னா, அப்ப பெண்கள் வேலைக்குப் போகல. ஆண்கள்தான் பொருளாதார ரீதியாக குடும்பத்தை கவனித்தார்கள். எனவே, ஆண் இல்லாவிட்டால் பெண் தனியாக வாழவே முடியாது. குழந்தைகளை வளர்க்க முடியாது.

அப்படிப்பட்ட சூழலில் எல்லாத்தையும் பொறுத்துக்கொண்டு போகும் நிலை இருந்தது.

இப்ப, பெண்கள் நன்கு கல்வி கற்றவர்களாக இருக்கின்றனர். கேரளாவுக்கு அடுத்தபடி பெண்கள் அதிகம் படித்த மாநிலமாக தமிழகம் இருக்குது.

இந்தப் படிப்பறிவினால் நல்ல வேலைக்குப் போகின்றனர். பொருளாதார ரீதியாக தங்களைத் தாங்களே உயர்த்திக் கொள்வதற்கான எல்லா முயற்சிகளையும் எடுக்கின்றனர்.

அதனால், முன்னாள் கணவன் அடிப்பதை பொறுத்துக்கொண்டு போவது அவசியம் என்று நினைக்கவில்லை.

விவாகரத்தை ஒரு பெண், மனைவியாக இருந்து மட்டும் எடுக்கும் முடிவல்ல. நிறைய இடங்களில் கணவர்கள் குடித்து வந்து அடிக்கின்றனர், கெட்டவார்த்தைகள் பேசுகின்றனர்... இப்படியாக பல சிக்கல்கள்.

இதில் மனைவியுடன் குழந்தைகளும் பாதிக்கப்படுகின்றனர்.

அவங்கள் மனநிலையும் பாதிக்கப்படுகிறது. அப்ப அதையும் யோசித்து, நாம் பேசாமல் தனியாக வந்துடலாமென்று நினைக்கின்றனர்.

இதில் தப்பு இருக்கிற மாதிரி தெரியவில்லை.