இந்தியா முழுக்க மருத்துவர்கள் மீது வன்முறை ஏன்..?

மருத்துவர்களைக் கடவுளுக்கு இணையாகச் சொல்வார்கள். ஆனால், அண்மைக்காலமாக இந்தியா முழுக்க மருத்துவர்கள் மீதான தாக்குதல்கள் இந்த நம்பிக்கையை உடைத்துவிடுமோ என்ற அச்சம்தான் நிலவுகிறது.

- டி.ரஞ்சித்

மருத்துவர்களைக் கடவுளுக்கு இணையாகச் சொல்வார்கள். ஆனால், அண்மைக்காலமாக இந்தியா முழுக்க மருத்துவர்கள் மீதான தாக்குதல்கள் இந்த நம்பிக்கையை உடைத்துவிடுமோ என்ற அச்சம்தான் நிலவுகிறது.

சில மாதங்களுக்கு முன்புதான் கொல்கத்தாவைச் சேர்ந்த இளம் பெண் மருத்துவர் பாலியல் வன்புணர்வுக்கு உட்படுத்தப்பட்டு கொலை செய்யப்பட்டார்.

இந்தியா எங்கும் கோப அலைகளை எழுப்பிய இந்தச் சம்பவம் நினைவிலிருந்து மறையும் முன்னே சென்னையில் ஒரு மருத்துவர் பலமுறை கத்தியால் குத்தப்பட்ட சம்பவமும் அரங்கேறியிருக்கிறது.

இந்தச் சம்பவங்களுக்குப் பின்புலமாக மருத்துவர்களும் அவர்கள் சார்ந்த அமைப்புகளும் என்ன கருதுகிறார்கள்?

இந்திய மருத்துவர்கள் அனைவரையும் உள்ளடக்கிய இந்திய மருத்துவக் கழகம் (IMA - Indian Medical Association) 2021ல் இது தொடர்பாக ஓர் ஆய்வைச் செய்தது. அதில் 75 சதவீத மருத்துவர்கள் ஏதோ ஒருவிதமான வன்முறையை தினசரி சந்திக்க நேரிடுவதாகச் சொன்னது.

இந்த வன்முறைகள் உடல் ரீதியானது உட்பட வாய்ப்பேச்சு வரைக்கும் இருக்கும்.

அடுத்து இந்த 75 சதவீத வன்முறைகளில் சுமார் 68.33 சதவீத வன்முறைகள் நோயாளிகளின் உறவினர்களாலே நடத்தப்பட்டதாக இந்த ஆய்வு கண்டுபிடித்திருக்கிறது.

இது தவிர இன்னொரு லேட்டஸ்ட் ஆய்வும் அதிர்ச்சியான தகவல்களைத் தருகிறது.

அதே இந்திய மருத்துவக் கழகத்தின் கேரள கிளை இந்த வருடம் ஆகஸ்ட் மாதத்தில் ஓர் ஆய்வை மேற்கொண்டது. இந்த ஆய்வு இந்தியா முழுக்க இருந்து சுமார் 3885 மருத்துவர்களை ஆய்வுக்கு எடுத்துக் கொண்டது. இதில் 60 சதவீதம் பெண் மருத்துவர்கள்.

இந்த ஆய்வில் 11 சதவீத மருத்துவர்கள் தாங்கள் வேலை பார்க்கும் மருத்துவ வளாகங்கள் முற்று முழுதாக பாதுகாப்புக்கு ஏற்றதல்ல என்று கூறியிருக்கிறார்கள்.