அயோத்திக்கும் இந்தப் படத்துக்கும் தொடர்பில்லை!

அமரர் ஊர்தி ஓட்டுநரின் வாழ்க்கையை மையமாக வைத்து உருவாகியுள்ள படம் 'போகுமிடம் வெகு தூரமில்லை'.

- 

விமல், கருணாஸ் முதன்மை வேடத்தில் நடித்துள்ளனர். அறிமுக இயக்குநர் மைக்கேல் கே.ராஜா இயக்கியுள்ளார். இதன் டிரைலர் வெளியாகி வரவேற்பைப் பெற்றிருக்கிறது.‘‘படத்துக்கும் என் சொந்த வாழ்க்கைக்கும் பெரிய வித்தியாசம் இல்லை. என்னுடைய தனிப்பட்ட வாழ்க்கையில் நான் அனுபவித்த வலியையும், வேதனையையும்தான் என்னுடைய கதாநாயகனும் அனுபவிக்கிறார்.

அது பலருடைய வாழ்க்கையிலும் நடந்திருக்கும். அந்த வகையில் இது ரசிகர்களை சுலபமாக கனெக்ட் செய்யும் படமாக இருக்கும்...’’ உற்சாகமாக பேச ஆரம்பித்தார் இயக்குநர் மைக்கேல் கே.ராஜா. டைட்டில் நல்லாயிருக்கே?

இது டிராவல் கலந்த ஃபேமிலி டிராமா. 70 சதவீதம் டிராவல் கதையாக இருக்கும். அமரர் ஊர்தி ஓட்டுநரின் வாழ்க்கையில் நடக்கும் சில சம்பவங்கள்தான் படம்.

‘அயோத்தி’ படத்துடன் சம்பந்தப்படுத்தி சிலர் பேசுகிறார்கள். ‘அயோத்தி’ படத்துக்கும் எங்கள் படத்துக்கும் எந்த சம்பந்தமும் இல்லை. 10 வருஷங்களுக்கு முன்பே இந்தப் படத்தோட பைலட் காப்பியை குருசோமசுந்தரம், விஸ்வந்த்தை வெச்சு எடுத்திருக்கிறேன். அந்தவகையில் இது ஃபிரஷ் ஸ்டோரி.

சென்னையிலிருந்து திருநெல்வேலிக்கு பிணத்துடன் அமரர் ஊர்தியில் பயணிக்கிறார் விமல். வழியில் கூத்துக் கலைஞர் கருணாஸ் சந்திப்பு நடக்கிறது. கருணாஸை ஏத்துக்கவும் முடியாது, தவிர்க்கவும் முடியாது. ஆனாலும் அவர் உதவி தேவை என்பதால் தொடர்ந்து டிராவல் பண்ணுகிறார் விமல். இரண்டு துருவங்களாக இருக்கும் அவர்களிடையே நட்பு மலர்கிறது. அதன் முடிவு என்ன என்பது க்ளைமாக்ஸ்.

ஒருவருக்கு ஒருவர் உதவும் மனப்பான்மை உள்ளவர்களாக இருக்க வேண்டும் என்பதுதான் படத்தோட மெசேஜ். எல்லோரும் ஒவ்வொரு தேவைகளுக்காக ஓடிக் கொண்டு இருக்கிறோம். அவரவர் தேவை அவரவர்களுக்கு நியாயமா  தெரியும். முழுமையா கெட்டவர்கள் என்று யாரையும் சொல்ல முடியாது. சந்தர்ப்பம், சூழ்நிலையால் அவர்களுடைய செயல்கள் நம்முடைய பார்வைக்கு கெட்டவர்கள் போல் தெரிவதுண்டு. அதை முடிந்தளவுக்கு யதார்த்தமா சொல்ல முயற்சித்துள்ளேன்.