உலகின் விதைப் பெட்டகம்!

24 மணிநேரமும் சூரியன் இருக்கும் இத்தீவில்தான் உலகின் 13 லட்சம் பயிர் விதைகள் பாதுகாக்கப்படுகின்றன!

- பேராச்சி கண்ணன்

 

ஸ்வல்பார்டு... ஆர்க்டிக் பெருங்கடலில் அறுபது சதவீதம் பனியாலும், உறைந்துபோன பனிக்கட்டிகளாலும், அடர்ந்த மலைத்தொடர்களாலும் நிறைந்த ஒரு தீவுக்கூட்டத்தின் பெயர் இது.

உலக வரைபடத்தின் விளிம்பில் துருவப் பகுதியிலுள்ள இந்தத் தீவுக்கூட்டம் நார்வே நாட்டிற்குச் சொந்தமானது. ஸ்பிட்ஸ்பெர்ஜென், நார்டாஸ்ட்லேண்டட், எட்ஜ் ஆகிய மூன்று தீவுகள் அடங்கிய இந்த தீவுக்கூட்டம், உலகின் பொக்கிஷங்களில் ஒன்று என்றால் அது மிகையல்ல. இதற்கு நிறைய காரணங்களும் இருக்கின்றன.

ஆம். இங்குதான் உலகின் உன்னதமான பயிர் பன்முகத்தன்மைக்கான பாதுகாப்புப் பெட்டகம் உள்ளது. தவிர, ஆர்க்டிக் பிரதேசங்களை ஆய்வு செய்யும் ஆய்வுக்கூடம், துருவக் கரடிகள், துருவ இரவு, நள்ளிரவு சூரியன் உள்ளிட்ட பல்வேறு ஆச்சரியங்களும் நிரம்பியுள்ளன. அத்துடன் கியாகிங், ஸ்நோமொபைல் எனப்படும் பனிவண்டி பயணம், நாய்கள் வண்டியை இழுத்துச் செல்லும் சஃபாரி உள்ளிட்டவை இருக்கின்றன. இதனாலேயே பல ஆண்டுகளாக இது சிறந்த சுற்றுலாத்தலமாகவும் விளங்கி வருகிறது.

சரி, அதென்ன உலகின் பயிர் பன்முகத்தன்மை?

அதைப் பற்றி பார்க்கும்முன் இந்தத் தீவுக்கூட்டத்தைப் பற்றி இன்னும் சில சுவாரஸ்யமான விஷயங்களைப் பார்ப்போம். இந்தத் தீவுக்கூட்டத்தில் ஸ்பிட்ஸ்பெர்ஜென் தீவே பெரியது. இதில் மட்டுமே மனிதர்கள் வசிக்கின்றனர்.

2023ன் கணக்குப்படி இங்கு மொத்தம் 2 ஆயிரத்து 530 பேர்கள் வாழ்கின்றனர்.இதில், நார்வேயர்கள், ஜெர்மானியர்கள், ரஷ்யர்கள், போலந்துக்காரர்கள், ஸ்வீடன்காரர்கள், டென்மார்க்கைச் சேர்ந்தவர்கள் உள்ளனர். பெரும்பாலானவர்கள் கிறிஸ்துவர்கள். இதில் பலர் நிலக்கரிச் சுரங்க வேலைக்காக வந்து செட்டிலானவர்கள்.