சபாஷ் சாய்பல்லவி!

அருள்நிதி நடிப்பில் வெளியான படம் படிப்ளாக். தான் படிக்கும் பொறியியல் கல்லூரியில் நடக்கும் கொலைகளை நாயகன் அருள்நிதி கண்டுபிடிக்கிற கதை. யூ ட்யூபில் பிரபலமான விஜய்குமார் ராஜேந்திரனின் இயக்கம் என்பதால் டூ கே கிட்ஸ் மத்தியில் ஒருவித எதிர்பார்ப்பை கிளப்பிய படம், அந்த எதிர்பார்ப்பைப் பூர்த்தி செய்யவில்லை என்பதுதான் உண்மை. காட்சி களில் அழுத்தம் இல்லாதது, படம் நெடுக நமக்குள் எழும் கேள்விகள் என்று படத்தை தொய்வடையச் செய்கின்றன. அருள்நிதியும் அவர் நடிப்பும் மட்டுமே படத்தின் ஒரே ஆறுதல்.

- 

அடுத்ததாக ராக்கெட்ரி நம்பி விளைவு. இஸ்ரோ விஞ்ஞானி நம்பி நாராயணின் பயோபிக் இந்த மாதம் வெளியானதில் பரவலாகப் பேசப்பட்ட ஒரு படம். மாதவனின் இயக்கத்திலும் நடிப்பிலும் வெளியான இப்படத்தில் நம்பி நாராயணன், இஸ்ரோ விஞ்ஞானியாக இருந்தபோது சாதித்தவைகளையும், அவர் சந்தித்த தேச துரோக வழக்கு அவர் வாழ்க்கையை புரட்டிப்போட்டதையும் படமாக்கியிருக்கிறார். மாதவனின் உழைப்புக்கு எத்தனை பாராட்டினாலும் தகும். படத்தை எழுதி, தயாரித்து, இயக்கியதோடு நம்பியாகவே முழுமையாக மாறியிருக்கிறார் மாதவன்.

அனைவரும் தெரிந்து கொள்ள வேண்டிய வரலாறு என்பதால் முக்கியமான படமாக நிற்கிறது ராக்கெட்ரி.