ദാ വരുന്നു പരിസ്ഥിതി ദിനം

ഇക്കൊല്ലത്തെ കഠിനമായ ചൂട് നിങ്ങൾ ശ്രദ്ധിച്ചിട്ടുണ്ടാകും. കേരളത്തിൽ ഇങ്ങനെ ചൂടനുഭവപ്പെടുന്നത് സാധാരണമല്ല. നാലഞ്ചുവർഷം മുമ്പ് മഴ തിമിർത്തു പെയ്ത് വെള്ളപ്പൊക്കം ഉണ്ടായതും ഓർമ്മയില്ലേ? ഈ വർഷത്തെ തണുപ്പുകാലവും സാധാരണ പോലെ ആയിരുന്നില്ല. കേരളത്തിലെ കാലാവസ്ഥയ്ക്ക് എന്തുപറ്റി? ഇവിടെ മാത്രം ഉള്ളതല്ല ഈ മാറ്റം. നമ്മുടെ ഭൂമിക്കു ചുറ്റുമുള്ള വായുവിന്റെ ചൂട് കൂടുന്നുണ്ടത്രേ. അപ്പോൾ കരയെന്നപോലെ കടലും അമിതമായി ചൂടാകും. ഭൂമിയുടെ ധ്രുവങ്ങളിലെ ഐസ് ഉരുകും. കടലിൽ വെള്ളം കൂടും. അങ്ങനെ വരുമ്പോൾ ചില ദ്വീപുകളും കടലിനോടു ചേർന്നുകിടക്കുന്ന കേരളം പോലുള്ള സ്ഥലത്തെ തീരപ്രദേശങ്ങളുമാണ് വിഷമത്തിലാകാൻ പോകുന്നത്.

- ഡോ. ഖലീൽ ചൊവ്വ

ജൂൺ മാസം അഞ്ചാം തീയതി സമാഗതമാകുകയാണ്. ആ ദിവസത്തിന് ഒരു പ്രത്യേകതയുണ്ടെന്ന് നമുക്കെല്ലാം അറിയാം. അന്നാണ് ലോകമെമ്പാടും പരിസ്ഥിതി ദിനം ആചരിക്കപ്പെടുന്നത്. എന്തുകൊണ്ടാണ് ജൂൺ അഞ്ചാം തീയതി പരിസ്ഥി തിദിനമായി ആചരിക്കുന്ന തെന്ന് കൂട്ടുകാർക്കറിയാമോ? പറയാം, പരിസ്ഥിതിനാശത്തെക്കുറിച്ച് ചർച്ചചെയ്യാനും പരിഹാരം കണ്ടെത്താനും ആയി സംഘടിപ്പിക്കപ്പെട്ട ആദ്യത്തെ ഭൗമ ഉച്ചകോടി ഒരു ജൂൺ അഞ്ചാം തീയതി യാണ് ആരംഭിച്ചത്. എവിടെ വച്ചായിരുന്നെന്നോ? സ്വീഡനിലെ സ്റ്റോക്ക് ഹോം എന്ന സ്ഥലത്തുവച്ച്.

1972 ൽ നടന്ന ഈ സമ്മേളനത്തിന്റെ ഉദ്ഘാടനദിനം ഓർമ്മിക്കാനും തുടർപരിപാടികൾക്കും ആയി ഐക്യരാസഭയാണ് അടുത്ത വർഷം, അതായത് 1973മുതൽ ജൂൺ 5 ന് ലോക പരിസ്ഥിതിദിനം ആചരി ക്കാൻ തീരുമാനിച്ചത്.

പരിസ്ഥിതിദിനാചരണത്തിന്റെ ഭാഗമായി ഒരു വിഷയവും സന്ദേശവും എല്ലാവർഷവും പ്രചരിപ്പിക്കാറുണ്ട്. ആദ്യത്തെ പരിസ്ഥിതിദിനത്തിന്റെ സന്ദേശം ഒരേയൊരു ഭൂമി മാത്രം' എന്നുള്ളതായിരുന്നു. ഇത്തരത്തിൽ ഓരോ കാലത്തും പ്രസക്തമായ വിഷയങ്ങളാണ് പിന്നീടുള്ള വർഷങ്ങളിൽ അവതരിപ്പിച്ചിരുന്നത്. ജല സംരക്ഷണം, മാലിന്യനിർമ്മാർജനം, ആഗോളതാപനം, ദാരിദ്ര്യവും പരിസ്ഥിതിയും തുടങ്ങിയ വിഷയങ്ങളെല്ലാം ഇതിനുമുമ്പ് പ്രമേയങ്ങളായിട്ടുണ്ട്.

ഈ വർഷത്തെ വിഷയം അഥവാ പ്രമേയം എന്തെന്നറിയാൻ നിങ്ങൾക്ക് ജിജ്ഞാസയുണ്ടാകും. ഭൂപുനഃസ്ഥാപനം, മരുവത്കരണ വരൾച്ചാ പ്രതിരോധം' എന്നതാണ് ഈ വർഷത്തെ പ്രമേയം. നമുക്ക് മലിനമാക്കപ്പെട്ട ഭൂമിയെ പഴയ നിലയിലേക്ക് എത്തിക്കുവാനാകണം, മരുഭൂമിയുടെ അളവ് കൂടിവരുന്നത് കുറയ്ക്കാനാകണം, വരൾച്ചയിൽ നിന്ന് കരകയറാനുമാകണം. ലോകമെങ്ങുമുള്ള മനുഷ്യരും സർക്കാരുകളും അതിനൊക്കെവേണ്ടി ജാഗ്രതയോടെ പ്രവർത്തിക്കണമെന്ന സന്ദേശമാണ് ഈ പ്രമേയത്തിൽ അടങ്ങിയിട്ടുള്ളത്. ഇന്നത്തെ കാലത്ത് ഏറെ ചർച്ച ചെയ്യപ്പെടേണ്ട വിഷയം തന്നെയാണിത്.