കനിവ് തേടുന്ന കർഷകർ

റബറിന്റെ പുഷ്കലകാലത്ത് കർഷകരും തൊഴിലാളികളും ചെറുകിട വ്യാപാരികളും ഉൾപ്പെടെ 13 ലക്ഷത്തോളമാളുകൾ ഈ മേഖലയിൽ ഉപജീവനമാർഗം കണ്ടെത്തിയിരുന്നു.

- 

തിക്കും തിരക്കും നിറഞ്ഞ മലയോര ടൗൺഷിപ്പുകൾ. കൊഴുക്കുന്ന അന്തിചന്തകൾ. ടാപ്പിങും ഷോട്ടറും എല്ലാമായി ആളന ക്കമുള്ള റബർ എസ്റ്റേറ്റുകൾ. റബർ കൃഷിയുടെ സുവർണ കാലം. ധനസമൃദ്ധമായ കാലത്തു നിന്നും ദാരിദ്ര്യത്തിന്റെ പടുകുഴിയിലേക്കു കൂപ്പുകുത്തുകയാണ് റബർ കർഷകരും മലയോര ജനതയും. റബ്ബർ കർഷകരാണെന്ന് പലരും അഭിമാനത്തോടെ പറയുന്ന ഒരു സമയമുണ്ടായിരുന്നു. റബ്ബർ ഷീറ്റിന് മികച്ച വിലയും കിട്ടി യിരുന്ന സമയം. ഉൽപാദന ചെലവു കഴിഞ്ഞ് നല്ലൊരു സംഖ്യ ചെറുകിട ഇടത്തരം കർഷകർക്കുപോലും ലഭിച്ചിരുന്ന കാലം. എന്നാൽ വളരെ വേഗമാണ് റബർ വില കുത്തനെ ഇടിഞ്ഞു. കേരളത്തിലേക്കും ഇന്ത്യയിലേക്കും റബർ സുലഭമായി ഒഴുകിയെത്തി. പ്രാദേശിക റബറിനെക്കാളും വില കുറവിൽ മേന്മ കുറഞ്ഞ റബർ കടൽ കടന്നെത്തി. ഇതോടെ കർഷക ജനതയുടെ ജീവിതം താളം തെറ്റി. കർഷക കൂട്ടായ്മകൾ ഇല്ലാതെയായി, റബർ സംഘങ്ങൾക്കു പൂട്ടുവീണു. ചെറുകിട വ്യവസായികൾക്കൊപ്പം റബർ ഉൽപ്പാദക യൂണിറ്റുകളും ഇല്ലാതെയായി.

ഇല്ലാതായ ഉപജീവനം

റബറിന്റെ പുഷ്കലകാലത്ത് കർഷകരും തൊഴിലാളികളും ചെറുകിട വ്യാപാരികളും ഉൾപ്പെടെ 13 ലക്ഷത്തോളമാളുകൾ ഈ മേഖലയിൽ ഉപജീവനമാർഗം കണ്ടെത്തിയിരുന്നു.

എന്നാൽ വില കുറഞ്ഞതോടെ ടാപ്പിങ് തൊഴിലാളികൾ ഈ തൊഴിൽ വിട്ടു മറ്റു തൊഴിലിടങ്ങൾ തേടിപ്പോയി. നാമമാത്ര വിലയും കനത്ത ചിലവുകളുമാണ് കർഷകരെ റബർ കൃഷിയിൽ നിന്നും അകറ്റുന്നത്. റബ്ബർ കൃഷി തുടങ്ങി ആദ്യത്തെ ഏഴു വർഷക്കാലം കർഷകന് ഒരു പൈസ പോലും വരുമാനമില്ല. നല്ല ചിലവുകൾ വേണ്ടിയും വരും. കൃഷി ചെയ്യുന്നതിനും വളമിടുന്നതിനും കളകൾ പറിക്കുന്നതിനും മറ്റുമുള്ള ഭീമമായ ചെലവുകൾ കൃഷിക്കാർ തന്നെ വഹിക്കേണ്ടി വരുന്നു.

ടാപ്പിംഗ് ആരംഭിച്ചതിനു ശേഷവും വർഷത്തിൽ രണ്ടു തവണയെങ്കിലും വളവും കൃഷിയിടം ഒരുക്കേണ്ടിയും വരുന്നു. ഇലകൾക്ക് കേടുപാടുകൾ വരാതിരിക്കാൻ തുരിശ്ശടിക്കണം. കുമിൾ രോഗമാണ് കൃഷിയെ ബാധിക്കുന്ന മറ്റൊരു പ്രശ്നം. ഇതിന് ബോർഡോ മിശ്രിതം (തുരിശും ചുണ്ണാ മ്പും വെള്ളത്തിൽ കലർത്തിയെടുക്കുന്ന മിശ്രിതം) പുരട്ടണം. അല്ലെങ്കിൽ മരം ഉണങ്ങിപ്പോകും. മറ്റു മരങ്ങൾക്ക് രോഗം വ്യാപിക്കുകയും ചെയ്യും. കായികാദ്ധ്വാനം നല്ല രീതിയിൽ ആവശ്യമുള്ള ജോലിയാണിത്. മറ്റൊന്ന് ഇലപ്പുള്ളി രോഗമാണ്. അതിനും കൃത്യമായ പരിഹാരം കാണണം.