റോഡ് നിയമങ്ങൾ ആർക്കുവേണ്ടി

നിയമത്തെക്കുറിച്ചുള്ള അജ്ഞത ന്യായീകരണമല്ല

- ദിലീപ് കുമാർ കെ.ജി. മോട്ടർ വെഹിക്കിൾസ് ഇൻസ്പെക്ടർ സബ് ആർ.ടി. ഓഫിസ്, പെരുമ്പാവൂർ.

ഹെൽമറ്റ് ഉപയോഗിക്കാത്തതിനു കേസ് എഴുതുമ്പോൾ ഹെൽമറ്റ് വയ്ക്കാതെപോകുന്ന മറ്റുള്ളവരെ ചൂണ്ടിക്കാണിച്ച് സ്വന്തം പിഴവിനെ ചിലർ ന്യായീകരിക്കും. പൊലീസിനെയോ ക്യാമറയോ കാണുമ്പോൾ മാത്രം സീറ്റ് ബെൽറ്റ് വലിച്ചിടാൻ മക്കളെ ഓർമിപ്പിക്കുന്നവരുമുണ്ട്. നിയമം നമുക്കു വേണ്ടിയല്ല വേറെ ആർക്കോ വേണ്ടിയാണ് എന്ന തോന്നലാണ് ഇതിന്റെ അടിസ്ഥാനം.

റോഡ് നിയമങ്ങൾ എന്ത്? എങ്ങനെ?

ഡിഫൻസീവ് ഡ്രൈവിങ്ങിന്റെ അടുത്തഘട്ടം റോഡിലെ അവകാശം എന്തെന്ന റിയുകയാണ്. അതു പാലിക്കുകയും ചെയ്യണം. റോഡിൽ നടക്കുന്ന അപകടങ്ങൾക്കെല്ലാം കാരണം ഏതെങ്കിലും അടിസ്ഥാന നിയമത്തിന്റെ ലംഘനമാണ്.

ഒരാളുടെ ചെറിയൊരു നിയമലംഘനം മതിയാകും മറ്റൊരാളുടെ മരണത്തിനു കാരണമാകാൻ. പൊലീസ് പരിശോധന കാണുന്ന മാത്രയിൽ നിയമലംഘകർക്കു മുന്നറിയിപ്പുകൊടുത്ത് അവരെ രക്ഷപ്പെടുത്തുവാൻ കാണിക്കുന്ന സഹജീവിസ്നേഹത്തിന്റെ കാര്യത്തിൽ നമ്മൾ മുൻപിലാണ്. അപകടത്തിനിരയായി റോഡിൽക്കിടക്കുന്ന ഒരാളെ രക്ഷിക്കാൻ അത്രത്തോളം ജാഗ്രത നമ്മൾ കാണിക്കാറില്ല.