ഹലോ ഹനോയ്

ചരിത്രവും മിത്തുകളും കെട്ടുപിണഞ്ഞുകിടക്കുന്ന, ഗുഹകളും തടാകവും കണ്ണിന് വിരുന്നേകുന്ന വിയറ്റ്നാം തലസ്ഥാനമായ ഹനോയ്ക്കും ഹോചിമിൻ സിറ്റിക്കുമിടയിലൊരു യാത്ര ...

- എം. ഹേമന്ത്

വശ്യമായ സൗന്ദര്യമുണ്ട് വിയറ്റ്നാമിന്. മാന്ത്രികതകൾ നിഗൂഢമായി ഒളിപ്പിച്ച നാട്. പതിഞ്ഞ താളമുള്ള, നമ്മെ മൃദുവായി പുണരുന്ന രാജ്യം. ചരിത്രവും മിത്തുകളും കെട്ടുപിണഞ്ഞ് കിടക്കുന്ന ആ നാട്ടിലേക്കുള്ള യാത്ര മനം മയക്കും. ആ രാജ്യവും അവിടത്തെ ആളുകളും ചിരപരിചിതർ എന്ന ഭാവം നമ്മിൽ ഉണർത്തും.

വിയറ്റ്നാമുകാരുടെ ഉജ്ജ്വല ചരിത്രവും അവരുടെ ധീരനായകൻ ഹോചിമിനോടുള്ള ആരാധനയോളം പോന്ന ഇഷ്ടവുമാണ് ഹനോയ് സന്ദർശിക്കാൻ പ്രേരിപ്പിച്ചത്. ദൂങ് തു ഹൗങ് എഴുതിയ 'മെമ്മറീസ് ഓഫ് എ പ്യുർ സ്പ്രിങ്' വായിച്ചതോടെ വിയറ്റ്നാം കാണണമെന്ന ആഗ്രഹം മനസ്സിൽ കുടിയേറി. ഒരുക്കമെല്ലാം വേഗത്തിൽ നടത്തി. ബാങ്കോക് വഴിയോ ക്വലാലംപുർ വഴിയോ അധികം ചെലവില്ലാതെ ഹനോയിൽ എത്താം. ഞങ്ങൾ തിരഞ്ഞെടുത്തത് ബാങ്കോക് വഴിയുള്ള യാത്രയും ക്വലാലംപുർ വഴിയുള്ള മടക്കയാത്രയുമാണ്. ഇരു രാജ്യങ്ങളും മുമ്പ് സന്ദർശിച്ചിരുന്നതിനാൽ തന്നെ അവിടെ ഇറങ്ങുക അജണ്ടയിലുണ്ടായിരുന്നില്ല. കൃത്യമായ പദ്ധതിയും ചെലവഴിക്കാൻ ദിവസങ്ങളും ഉണ്ടെങ്കിൽ ഒറ്റ യാത്രയിൽ തായ്ലൻഡും മലേഷ്യയും സിംഗപ്പൂരും ഒരുമിച്ച് കണ്ടുമടങ്ങാം.

ഹോചിമിന്റെ നാട്

അമേരിക്കയെയും അതിനുമുമ്പ് ഫ്രാൻസിനെയും പരാജയപ്പെടുത്തിയ ജനതയാണ് വിയറ്റ്നാമുകാർ. അക്കാലത്ത് , ഈ ലേഖകൻ ജനിക്കുന്നതിന് രണ്ടുവർഷം മുമ്പുവരെ 'മേരാ നാം തേരാ നാം വിയറ്റ്നാം' എന്ന മുദ്രാവാക്യം കേരളത്തിലടക്കം മുഴങ്ങി. ഹനോയിലേക്ക് പോകുംമുമ്പ് ആഗ്രഹിച്ച ഒന്നാണ് വിയറ്റ്നാമുകാരുടെ നായകൻ ഹോചിമിന്റെ ഭൗതികശരീരം കാണണമെന്നത്. 1969ൽ അന്തരിച്ച ഹോചിമിന്റെ ഭൗതികശരീരം എംബാം ചെയ്ത് കരുതലോടെ സൂക്ഷിച്ചിരിക്കുന്നു.

വിമാനത്താവളത്തിൽനിന്ന് നേരെ ഹോചിമിൻ മൊസോളിയത്തിലേക്ക് നീങ്ങി. ചില ദിവസങ്ങളിൽ നിശ്ചിത സമയങ്ങളിലേ മൊസോളിയത്തിൽ കയറാനാവൂ. അവിടെ വിയറ്റ്നാമിന്റെ വീരനായകൻ ശാന്തമായി ഉറങ്ങുന്നു. മൊസോളിയം പ്രൗഢഗംഭീരമാണ്. നമ്മൾ അറിയാതെ ചരിത്രത്തിന്റെ താളുകളിൽ ചെന്നുനിൽക്കും. പരിപൂർണ നിശ്ശബ്ദതയാണ് ഇവിടെ പാലിക്കേണ്ടത്. ഫോട്ടോയെടുക്കാൻ അനുവാദമില്ല. കൈയിൽ വെള്ളമോ ഒന്നും അകത്തേക്ക് കൊണ്ടുപോകാൻ കഴിയില്ല. ഫോട്ടോ മൃതദേഹത്തിൽ മാറ്റം വരുത്തുമെന്നതു കൊണ്ടാണ് ഈ നിയന്ത്രണം.