ഒരു സർക്കസ്സ് കലാകാരി

സർക്കസ്സിലെ ഒരു പ്രധാന ഐറ്റമായ ഗ്ലോബിനുള്ളിലെ മോട്ടോർ സൈക്കിൾ സവാരിയിലൂടെ ശ്രദ്ധേയ താരമായി മാറിയ വിശാലാക്ഷി ഈ രംഗത്തെ ആദ്യവനിതയെന്ന ഖ്യാതി നേടിയെടുത്തിട്ടുണ്ട്

- ജി. കൃഷ്ണൻ മാലം,

വൈദഗ്ദ്ധ്യത്തിന്റെയും ധൈര്യത്തിന്റെയും പ്രകടനങ്ങളുടെ ഒരു സംഗമവേദിയാണ് സർക്കസ്സ്. കലയുടെയും കായികവിനോദത്തിന്റെയും ഒരു സംഗമസ്ഥലം കൂടിയാണ് സർക്കസ് കൂടാരം.

വടക്കൻ മലബാറിൽ, അതായത് വടകര, തലശ്ശേരി, കണ്ണൂർ ഭാഗങ്ങളിലുള്ളവരാണ് സർക്കസ്സ് രംഗത്തുള്ളതെന്നും അവർ മറ്റുള്ള വരേക്കാൾ മെയ്വഴക്കമുള്ള വരും കായികാഭ്യാസികളും ധൈര്യശാലികളും ആയതു കൊണ്ടും കൂടിയാണ് സർക്കസ് രംഗത്ത് ശോഭിക്കുന്നതെന്നും പറയാറുണ്ട്. അതിന്റെ വസ്തുത എന്തുതന്നെയായാലും തലശ്ശേരി ഭാഗത്തുള്ള ഒരു സർക്കസ് താരത്തിന്റെ പഴയകാലത്തെ മനസ്സൊന്ന് തുറക്കാൻ ശ്രമിക്കുകയാണ്.

ഒരു വലിയ കൂടാരം പോലെയുള്ള ആ മനസ്സിൽ നിന്നും താരത്തിന്റെ വാക്കുകൾ കേൾക്കപ്പെട്ടു.

പേര് വിശാലാക്ഷി

തലശ്ശേരി ഇല്ലത്ത് താഴ സ്വദേശിയായ വിശാലാക്ഷി സർക്കസ്സ് രംഗത്തുനിന്നും റിട്ടയർ ചെയ്തശേഷം വിശ്രമജീവിതം നയിക്കുന്നു. വിശാലാക്ഷിയുടെ അനുജത്തിമാരായ പത്മിനിയും ഉമാദേവിയും സർക്കസ് രംഗത്ത് തന്നെയാണുണ്ടായിരുന്നത്. ഇവർ മൂന്നുപേരും സർക്കസ് രംഗത്ത് വരാനുണ്ടായ കാരണം ഇവരുടെ അച്ഛൻ വി.കെ. കണ്ണൻ എന്നറിയപ്പെടുന്ന വലിയപറമ്പത്ത് കോളോത്ത് കുഞ്ഞിക്കണ്ണനും സർക്കസ് രംഗത്തു തന്നെയായിരുന്നു. ഇദ്ദേഹം ക്ലൗൺ വേഷത്തിൽ പ്രത്യക്ഷപ്പെട്ടിരുന്നതു കൊണ്ടുതന്നെ ക്ലൗൺ കണ്ണനെന്ന് പറഞ്ഞാലായിരിക്കും ആളുകൾ കൂടുതൽ തിരിച്ചറിയുക.

സർക്കസ് രംഗത്തേക്ക് വരുന്നത് ഇഷ്ടമായിരുന്നുവോ?

ഇഷ്ടമായിരുന്നു. എനിക്ക് അഞ്ച് വയസ്സുള്ളപ്പോൾ തന്നെ ഞാൻ സർക്കസ് കളിക്കാൻ തുടങ്ങിയിരുന്നു.

ഏത് സർക്കസ് കമ്പനിയിലായിരുന്നു തുടക്കം? അച്ഛനും അമ്മയും ജെമിനി സർക്കസ്സിലായിരുന്നു ആദ്യം. അതിനുശേഷം റെഡ്മൺസ് സർക്കസ്സിലെ ത്തി. റെയ്മൺസ് സർക്കസ് കമ്പനി അച്ഛന്റെ ഒരു ബന്ധുവിന്റേതായിരുന്നു. അങ്ങനെ ഞങ്ങളെല്ലാവരും കുറെക്കാലം റെയ്മണ്ട് സർക്കസ്സിൽ തന്നെയായിരുന്നു. പുതിയ കുറെ ഐറ്റമെല്ലാം പഠിച്ചത് അവിടുന്നായിരുന്നു. ഗ്രൗണ്ട് സൈക്കിൾ, സ്റ്റാൻഡിംഗ് വെയർ, യുനി സൈക്കിൾ ഹോക്കി, ഡബിൾ വീൽ സൈക്കിൾ, സിംഹവുമായുള്ള ഏറ്റുമുട്ടൽ തുടങ്ങി ഗ്ലോബിനു ള്ളിലെ മോട്ടോർ സൈക്കിൾ സവാരി വരെ ഞാൻ ചെയ്തിട്ടുണ്ട്.