സ്വപ്നങ്ങളെത്തൊട്ട് ശരണ്യ

മിനിസ്ക്രീനിൽ വില്ലത്തിയായി വന്ന് പ്രേക്ഷകരുടെ മനംകവർന്ന ശരണ്യ ആനന്ദിന്റെ വിശേഷങ്ങൾ

- ബിന്ദു. പി.പി

ഗുജറാത്തിൽ നിന്ന് ശരണ്യ കേരളത്തിലേക്ക് ജീവിതം പറിച്ചുനടുമ്പോൾ സിനിമയും അഭിനയവുമായിരുന്നു മനസ്സ് നിറയെ. മകളുടെ അഭിനയ മോഹത്തോടൊപ്പം നിന്ന് അന്നുവരെയുണ്ടായ എല്ലാ ജീവിതവും ഉപേക്ഷിച്ച് വന്ന ഒരു മാതൃകാപരമായ കുടുംബമുണ്ട് ശരണ്യയ്ക്ക്. ശരണ്യ എന്നു പറഞ്ഞു കേൾക്കുന്നതിനേക്കാൾ മലയാളികൾക്ക് കുടുംബവിളക്കിലെ വേദിക എന്ന് പറയുന്നതായിരിക്കും കൂടുതലിഷ്ടം. അഭിനയമോഹം ലക്ഷ്യമാക്കി കൊച്ചിയിലേക്ക് ഷിഫ്റ്റ് ചെയ്യുന്ന ശരണ്യ ആഗ്രഹിച്ച ഒരു കാര്യമായിരുന്നു ചെയ്യുന്ന കഥാപാത്രത്തിന്റെ പേരിൽ അറിയപ്പെടുക എന്നത്. ഇപ്പോൾ ശരണ്യയെ എല്ലാവരും വിളിക്കുന്നതു പോലും വേദിക എന്നാണ് . പലർക്കും ശരണ്യ എന്ന പേര് പോലും അറിയില്ല. അതുതന്നെയാണ് ശരണ്യ എന്ന  അഭിനേത്രിയുടെ ഏറ്റവും വലിയ സന്തോഷം. മിനിസ്ക്രീൻ കുടുംബപ്രേക്ഷകരുടെ പ്രിയങ്കരിയായ ശരണ്യ തിളങ്ങാൻ തുടങ്ങിയിട്ട് രണ്ടു വില്ലത്തിയായി വർഷം കഴിയുന്നു. സിനിമയിൽ തുടങ്ങി ഇപ്പോൾ മിനിസ്ക്രീനിലും തിളങ്ങി നിൽക്കുന്ന ശരണ്യ തന്റെ അഭിനയ ജീവിതത്തിൽ പൂർണ്ണ സംതൃപ്തയാണ്.

അഭിനയ ജീവിതത്തിലെ ട്വിസ്റ്റ്

സിനിമയുടെ എ.ബി.സി പോലും അറിയാതെയാണ് ഞാൻ കൊച്ചിയിലേക്ക് ഷിഫ്റ്റ് ചെയ്യുന്നത്. അച്ഛന്റെ ബിസിനസ്, എന്റെ സുഹൃത്തുക്കൾ, അനിയത്തിയുടെ വിദ്യാഭ്യാസം അങ്ങന എല്ലാം ഇങ്ങോട്ട് പറിച്ചുനടുകയായിരുന്നു. നായികയായി രണ്ട് സിനിമ ചെയ്തു. ലാഫിംഗ് അപാർട്ട്മെന്റ് നിയർ ഗിരി നഗറും തൻഹയും. അതിനു മുമ്പ് മമ്മൂക്കയുടെ സിനിമ മാമാങ്കത്തിലും വിനയൻ സാറിന്റെ സിനിമ ആകാശഗംഗ 2 ലും അഭിനയിച്ചു.