പത്തിന്റെ പൂർണാവതാരം PELE (1940 -2022)

ഫുട്ബോളിലൂടെ വർണവിവേചനത്തിന്റെ കെട്ടുപാടുകൾ പൊട്ടിച്ച് ലോകത്തെ സമന്വയിപ്പിച്ച ഇതിഹാസമാണ് പെലെ

- എം.പി. സുരേന്ദ്രൻ

സാവോപോളോയിൽ ആൽബർട്ട് ഐൻസ്റ്റീൻ ആശുപത്രിയിൽ മക്കളുടെ കൈകളിൽ കൈചേർത്തുവെച്ചുകൊണ്ടാണ് പെലെ അവസാന നിമിഷങ്ങൾ പിന്നിട്ടത്. അത് പെലെയുടെ വിശ്വാസപ്രഖ്യാപനമാണ്. ജീവിതാവസാനംവരെ ഫുട്ബോളിൽ പെലെ സമർപ്പിച്ചത് ജീവിതപ്രേമത്തിന്റെ സത്തയാണ്. ഫുട്ബോളും ജീവിതവും നൈസർഗികമായ ഉൺമയാണ് എന്നു പെലെ പ്രഖ്യാപിക്കുകയായിരുന്നു.

കുട്ടിക്കാലത്ത് പെലെ ഫുട്ബോളിൽ കണ്ടെത്തിയതെല്ലാം ജീവിതാവസാനംവരെ നിലനിർത്തി. 1958-ലെ ലോകകപ്പിനുള്ള ബ്രസീലിയൻ ടീമിൽ പെലെ എന്ന പേര് പ്രഖ്യാപിച്ച നിമിഷം മുതൽ ഒരു ഇതിഹാസം തന്റെ അവർണനീയമായ ഫുട്ബോൾ യാത്ര തുടങ്ങുകയായിരുന്നു.

ബൗറുവിലെ വീട്ടിൽ കഴിയുമ്പോഴാണ് സെലിക്കോവോ സെലക്ഷന്റെ വാർത്ത റേഡിയോയിലൂടെ പെലെ കേൾക്കുന്നത്. അനൗൺസർ പേര് വായിക്കുന്നതിന് മുൻപുതന്നെ ആ പതിനേഴുകാരന്റെ ഹൃദയമിടിപ്പ് കൂടി. കാസ്റ്റില്ലോ, ഗിൽമർ, ജാൽമ സാന്റോസ്, നിൽട്ടൻ സാന്റോസ്, മസോള, പെലെ... അനൗൺസർ പേരുകൾ വീണ്ടും ആവർത്തിച്ചു. പെലെ എന്ന പേര് ഉറപ്പായും അയാൾ പറഞ്ഞു. പെലെ ആത്മകഥയിൽ എഴുതുന്നു. “കസേര യിലിരുന്ന് ഞാൻ രോഗിയെപ്പോലെ വിറച്ചു. എന്റെ പല്ലുകൾ കൂട്ടിയിടിച്ചു. ആ നിമിഷം എന്റെ അമ്മ മുറിയിലേക്ക് കടന്നുവന്നു. എന്റെ മുഖഭാവം കണ്ട് അവർ അമ്പരന്നു. ഞാൻ അമ്മയോട് പറഞ്ഞു: “മാമ, എന്നെ ബ്രസീൽ ടീമിൽ കളിക്കാൻ ക്ഷണിച്ചു. ഞാനത് വീണ്ടും ആവർത്തിച്ചു. അമ്മ പറഞ്ഞു: “നെറ്റി നോക്കട്ടെ പനിയുണ്ടോ? നിനക്ക് എന്തോ കുഴപ്പമുണ്ട്.

ആ നിമിഷമാണ് പെലെ എന്ന പതിനേഴുകാരൻ ആദ്യമായി ലോകത്തിന്റെ ശ്രദ്ധയിൽപ്പെടുന്നത്. ആ ലോകകപ്പ് പെലെ എന്ന ഇതിഹാസത്തിന്റേതാണ്. അത് ബ്രസീലിന്റെ ആദ്യത്തെ ലോകകപ്പ് വിജയമാണ്. 1938-ൽ ഒരു പരിശീലകന്റെ മരമണ്ടൻ തീരുമാനം കൊണ്ടോ ഫാസിസത്തിന് കീഴടങ്ങിയതു കൊണ്ടോ കിട്ടാതെപോയ കപ്പ്, സ്വന്തം നാട്ടിൽ കപ്പിനും ചുണ്ടിനുമിടയിൽ യുറഗ്വായോട് നഷ്ടപ്പെട്ട കപ്പ്. അന്ന് മാറക്കാനയിൽ വീണ കണ്ണീരിന് പകരം ബ്രസീൽ പുഞ്ചിരിച്ചത് 1958-ലാണ്. ആ പുഞ്ചിരി പെലെ ജീവിതകാലം മുഴുവൻ നിലനിർത്തി. പന്ത് എന്നതുപോലെ ലോകം മുഴുവൻ അറിയുന്ന ഒരേയൊരു കളിക്കാരൻ എഡ്സൺ ആരാസ് ദോനാസിമെന്റോ എന്ന മുഴുവൻ പേരിലുള്ള പെലെയാണ്.