വിധി മാറ്റിയെഴുതുന്ന സന്നിധി

തിരുച്ചിറപ്പള്ളി-ചെന്നൈ ദേശീയപാതയിൽ, തിരുച്ചിറപ്പള്ളിയിൽ നിന്നും ഇരുപത്തേഴ് കിലോമീറ്റർ അകലെ സ്ഥിതിചെയ്യുന്ന സിറുകന്നൂർ എന്ന സ്ഥലത്തുനിന്നും വീണ്ടും ആറുകിലോമീറ്റർ സഞ്ചരിച്ചാൽ സർവ്വ ദോഷ പരിഹാരക്ഷേത്രവും, ദുർവിധിയെ നല്ല വിധിയായി മാറ്റിക്കുറിക്കുന്ന തിരുപ്പട്ടൂർ ശ്രീ ബ്രഹ്മപുരീശ്വരക്ഷേത്രത്തിലെത്തിച്ചേരാം.

- അജയ്കുമാർ

തമിഴ്നാട്ടിൽ തിരുച്ചിറപ്പള്ളിയ്ക്കടുത്തുള്ള തിരുപ്പട്ടൂർ ശ്രീ ബ്രഹ്മപുരീശ്വരക്ഷേത്രം ഐതിഹ്യപ്രസിദ്ധമായ പുരാണ ക്ഷേത്രമാണ്. ബ്രഹ്മാവിന് അഹങ്കാരം മൂത്തപ്പോൾ ശിവൻ അദ്ദേഹത്തിന്റെ ഒരു തല നുള്ളിയെറിഞ്ഞത് തിരുവൈയാറിനടുത്തുള്ള തിരുക്കണ്ടിയൂരിലും ബ്രഹ്മാവ് അതിന് പരിഹാരം കണ്ടെത്തിയത് തിരുപ്പട്ടൂരിലുമാണെന്നാണ് ഐതിഹ്യം. 3001 വേദപണ്ഡിതന്മാർ ദിവസവും വേദങ്ങൾ പാരായണം ചെയ്തതിനാൽ ഉണ്ടായ കാന്തതരംഗങ്ങൾ ഇവിടെ എല്ലായിടത്തും വ്യാപിച്ചുകിടന്നതിനാൽ "തിരു പിടാവൂർ' എന്ന് പരിണമിച്ചുവത്രേ, വ്യാഘ്രപാദ മഹർഷി ശിവനെ ധ്യാനിച്ച് തപസ്സനുഷ്ഠിക്കുവാൻ കണ്ടെത്തിയ പുണ്യസ്ഥലം തിരുപ്പൂരായിരുന്നു. ഇവിടത്തെ ക്ഷേത്രക്കുളത്തിലെ വെള്ളം ആര് കയ്യിൽ എടുത്താലും അയാൾക്ക് ഗംഗയിൽ സ്നാനം ചെയ്ത ഫലം കിട്ടുമെന്നാണ് വിശ്വാസം. തിരു പട്ടൂർ കാശിക്ക് സമാനമായ പുണ്യസ്ഥലം മാത്രമല്ല, കൈലാസത്തിന് സമമായ പുണ്യസ്ഥലവും കൂടിയാണ്. ഈ ക്ഷേത്രത്തിൽ കുടികൊള്ളുന്ന മഹാവിഷ്ണുവിനെ തൊഴുത് പ്രാർത്ഥിച്ചതിനാലാണ് ആദി ശേഷൻ അടുത്തക്ഷണം തന്നെ പതഞ്ജലി മഹർഷിയായി മാറിയതത്. ബ്രഹ്മാവ് സൃഷ്ടിച്ച ബ്രഹ്മ തീർത്ഥക്കുളവും ശിവലിംഗ സന്നിധികളും ഇവിടെയുണ്ട്. ഇവിടെ വഴിപാട് നടത്തി പ്രാർത്ഥിച്ചാൽ പന്ത്രണ്ട് ശിവാലയങ്ങളിൽ ദർശനം നടത്തി പ്രാർത്ഥിച്ച ഫലം കിട്ടുമെന്നാണ് വിശ്വാസം. വിധിയുണ്ടെങ്കിലേ തിരുപ്പട്ടൂരിൽ ദർശനം നടത്താൻ ഭാഗ്യമുണ്ടാവൂഎന്നാണ് ചൊല്ല്. അതിനെ സാധൂകരിക്കുന്ന ഐതിഹ്യപശ്ചാത്തലവും തിരുപ്പട്ടൂർ ശ്രീ ബ്രഹ്മപുരീശ്വരക്ഷേത്രത്തിനുണ്ട്.