உயிர்த்த ஞாயிறு குண்டுத் தாக்குதல்கள் தொடர்பில் பிள்ளையான் முன்கூட்டியே முழுமையாக அறிந்துள்ளார்

உயிர்த்த ஞாயிறு குண்டுத்தாக்குதல்கள் தொடர்பில் பிள்ளையான் முன்கூட்டியே முழுமையாக அறிந்துள்ளார் என்பதற்கு உறுதியான சாட்சியம், தகவல்கள் கிடைத்துள்ளன. அத்துடன் அவர் மீது பெரும் சந்தேகங்கள் உள்ளன. அதேவேளை சாரா உயிருடன் உள்ளாரா அல்லது இறந்து விட்டாரா என்பதிலும் பாரிய சந்தேகம் உள்ளது என பொதுமக்கள் பாதுகாப்பு மற்றும் பாராளுமன்ற அலுவல்கள் அமைச்சர் ஆனந்த விஜேபால தெரிவித்தார்.

- பா. கிருபாகரன் - ந. ஜெயகாந்தன்

பாராளுமன்றத்தில் புதன்கிழமை இடம் பெற்ற உயிர்த்த ஞாயிறு தற்கொலைக் குண்டுத் தாக்குதல் தொடர்பான சபை ஒத்திவைப்பு வேளை விவாதத்தில் உரையாற்றுகையிலேயே இவ்வாறு தெரிவித்த அவர் மேலும் பேசுகையில்,

2019.04.21 ஆம் திகதி இடம் பெற்ற உயிர்த்த ஞாயிறு குண்டுத்தாக்குதல்கள் சம்பத்தினால் 42 வெளிநாட்டவர்கள் உட்பட 274 பேர் உயிரிழந்ததுடன், 592 பேர் படுகாயமடைந்துள்ள்ளனர். இந்த தாக்குதல்கள் குறித்த முதற்கட்ட விசாரணைகளுக்கு அமைய 748 சந்தேக நபர்கள் கைது செய்யப்பட்டனர். இரண்டாம் கட்டமாக 115 பேர் கைது செய்யப்பட்டு அவர்களில் 48 பேருக்கு எதிராக குற்றப்பத்திரம் தாக்கல் செய்யப்பட்டு வழக்குகள் தாக்கல் செய்யப்பட்டுள்ளன.

2019.04.22 ஆம் திகதியன்று குண்டுத்தாக்குதல்கள் சம்பவம் தொடர்பில் ஆராய்வதற்கு அப்போதைய ஜனாதிபதி மைத்திரிபால சிறிசேன உயர்நீதிமன்ற நீதியரசர் (ஓய்வு நிலை) விஜித் மலல்கொட தலைமையில் விசேட ஜனாதிபதி விசாரணை ஆணைக் குழுவை நியமித்தார். இந்த அறிக்கையை அடுத்த கட்ட விசாரணைகளுக்காக குற்றப்புலனாய்வு திணைக்களத்துக்கு வெகுவிரைவில் சமர்ப்பிப்போம். தேவையானால் பாராளுமன்றத்துக்கும் சமர்ப்பிப்போம்.

குண்டுத்தாக்குதல்கள் மேலும் விசாரணைகளை மேற்கொள்வதற்கு முன்னாள் ஜனாதிபதி மைத்திரிபால சிறிசேன 2019.09.21 ஆம் திகதி உயர்நீதிமன்ற நீதியரசர் (ஓய்வுநிலை) ஜனக் டி சில்வா தலைமையில் விசேட ஜனாதிபதி விசாரணை ஆணைக்குழுவை நியமித்தார். இந்த ஆணைக்குழு 2021.01.31 ஆம் திகதியன்று அப்போதைய ஜனாதிபதி கோத்தபாய ராஜபக்ஷவிடம் முழுமையான அறிக்கையை சமர்ப்பித்துள்ளது. இந்த அறிக்கை 68,738 பக்கங்களை கொண்ட து. இந்த அறிக்கை தொடர்பில் முன்னாள் ஜனாதிபதி கோத்தபாய ராஜபக்ஷ எவ்வித தகவல்களையும் வெளிப்படுத்தவில்லை.