தேவை... பணியிட மாற்றத்தில் மாற்றம்!

தமிழ்நாட்டில் இந்திய ஆட்சிப் பணி (ஐ.ஏ.எஸ்.) மற்றும் இந்திய காவல் பணி (ஐ.பி.எஸ்.) அதிகாரிகள் அடிக்கடி பணி யிட மாற்றம் செய்யப்படுவதால் நிர்வாகமும், பொதுமக்களும் பாதிக்கப்படுவது தொடர்கதையாகி வருகிறது.

- ப. இசக்கி

தமிழ்நாட்டில் இந்திய ஆட்சிப் பணி (ஐ.ஏ.எஸ்.) மற்றும் இந்திய காவல் பணி (ஐ.பி.எஸ்.) அதிகாரிகள் அடிக்கடி பணி யிட மாற்றம் செய்யப்படுவதால் நிர்வாகமும், பொதுமக்களும் பாதிக்கப்படுவது தொடர்கதையாகி வருகிறது. கடந்த பிப்ரவரி மாத முதல் வாரத்தில் 31 ஐ.ஏ.எஸ். அதிகாரிகள், அடுத்த ஒரு வாரத்தில் மாவட்ட ஆட்சியர் முதல் கூடுதல் தலைமைச் செயலர் வரை மேலும் 38 பேர் என மொத்தம் 69 பேர் பணியிட மாற்றம் செய்யப்பட்டுள்ளனர்.

அதேபோல், கடந்த டிசம்பரில், மாவட்ட காவல் கண்காணிப்பாளர் முதல் கூடுதல் காவல் துறைத் தலைவர் வரையில் 56 பேர் பணியிட மாற்றம் செய்யப்பட்டனர். பின்னர் கடந்த பிப்ரவரி இறுதியில் மேலும் 15 பேர் பணியிட மாற்றம் செய்யப்பட்டனர்.

அண்மைக்காலத்தில் நிகழ்ந்துள்ள பெரிய அளவிலான பணியிட மாற்றங்கள் இதுவாகும். பணியிட மாற்றம் செய்யப்பட்ட ஐ.ஏ. எஸ். அதிகாரிகளில் பொதுப்பணித் துறை, எரிசக்தி துறை, சுகாதாரத் துறை, நீர்வளத் துறை, பள்ளிக் கல்வித் துறை உள்ளிட்ட முக்கியத் துறைகளின் செயலர்களும் அடங்குவர். இவர்களில் சிலர் முந்தைய பணியிடங்களில் இருந்து சுமார் 4 முதல் 7 மாதங்களுக்குள் மீண்டும் பணியிட மாற்றம் செய்யப்பட்டுள்ளதாகவும் தெரிகிறது.

அதிகாரிகள் பணியிட மாற்றத்தால் ஆட்சி மற்றும் நிர்வாகத் திறன் மேம்படும்; அனுபவம் வாய்ந்த அதிகாரிகள் முக்கியத் துறைகளுக்கு நியமனம் செய்யப்படுவதால் நிர்வாகம் ஒழுங்குபடும்; அதன் மூலம் அரசின் கொள்கைகள் மற்றும் திட்டங்கள் செயலாக்கம் விரைவுபடுத்தப்படும் என அரசுத் தரப்பில் கூறப்பட்டாலும், அடிக்கடி மாற்றம் என்பது அத்தகைய நோக்கம் நிறைவேறுவதற்குப் பதிலாக, எதிர்மறை விளைவுகளையே ஏற்படுத்தும்.