தனித்துப் போட்டி: என்னவாகும் சீமானின் வாக்குகள்?

சட்டப்பேரவைத் தேர்தலில் மீண்டும் தனித்துப் போட்டி என நாம் தமிழர் கட்சியின் தலைமை ஒருங்கிணைப்பாளர் சீமான் அறிவித்துள்ளார். விஜய் கட்சியின் வரவால் நாம் தமிழர் கட்சியின் வாக்கு வங்கி என்னவாகும் என்பது அரசியல் அரங்கில் பேசுபொருளாகியிருக்கும் நிலையில், தனித்துப் போட்டி என்ற சீமானின் அறிவிப்பு பலரின் புருவத்தை உயர்த்த வைத்திருக்கிறது.

- பி.ஜெபலின் ஜான்

பி.ஜெபலின் ஜான்

சென்னை, மே 25: சட்டப்பேரவைத் தேர்தலில் மீண்டும் தனித்துப் போட்டி என நாம் தமிழர் கட்சியின் தலைமை ஒருங்கிணைப்பாளர் சீமான் அறிவித்துள்ளார். விஜய் கட்சியின் வரவால் நாம் தமிழர் கட்சியின் வாக்கு வங்கி என்னவாகும் என்பது அரசியல் அரங்கில் பேசுபொருளாகியிருக்கும் நிலையில், தனித்துப் போட்டி என்ற சீமானின் அறிவிப்பு பலரின் புருவத்தை உயர்த்த வைத்திருக்கிறது.

கோவை கொடிசியா மைதானத்தில் அண்மையில் நடைபெற்ற தமிழ் தேசிய இன எழுச்சி நாள் பொதுக்கூட்டத்தில், 2026 பேரவைத் தேர்தலில் நாம் தமிழர் கட்சி தனித்துப் போட்டி என சீமான் அறிவித்தார். நாம் தமிழர் கட்சிக்கு இதுவரை கிடைத்த வாக்குகள் என்னவாகும் என்பதை இதுவரை அந்தக் கட்சி சந்தித்த தேர்தல்களின் முடிவுகளைப் பார்த்தால் முழுமையாக அறியலாம்.

2016 பேரவைத் தேர்தலில் ஜெயலலிதா, கருணாநிதி என இரு பெரும் மக்கள் ஈர்ப்பு மிக்க ஆளுமைகளை மையப்படுத்தி நடந்த தேர்தலில் சீமானால் 1.13 சதவீத வாக்கு வங்கியைத்தான் பெற முடிந்தது. திமுக, ஒரு சதவீத வாக்கு வங்கி வித்தியாசத்தில் ஆட்சியைப் பிடிக்க முடியாமல் போனது.

இரு பெரும் ஆளுமைகள் மறைந்த நிலையில், 2019 மக்களவைத் தேர்தலில் மோடி, ராகுல் காந்தி என்ற இரு பிரதமர் வேட்பாளர்கள், பண பலம், ஜாதி பலம், அதிகார பலம் கொண்ட மத்திய, மாநிலக் கட்சிகளின் கூட்டணி, ஆளும்கட்சிக் கூட்டணிகளுக்கு எதிலும் சளைக்காத எதிர்க்கட்சிகள் கூட்டணி, மிகப் பெரிய திரையுலக நட்சத்திரமான கமல்ஹாசனின் அரசியல் பிரவேசம், ஜெயலலிதா, சசிகலாவிடம் அரசியல் பயின்ற டி.டி.வி.தினகரனின் அமமுக தனியாகக் களம் கண்டது போன்றவற்றால் பண பலம், அதிகார பலம் இல்லாத சீமானின் கட்சி நிச்சயம் காணாமல் போய்விடும் என்ற விமர்சனம் எழுந்தது.

அவற்றைப் புறந்தள்ளும் வகையில் தனித்துக் களம் கண்ட நா.த.க., 3.87 சதவீத வாக்குகள் பெற்று தனது வாக்கு வங்கியை மும்மடங்கு பெருக்கிக்கொண்டது, அனைவருக்கும் வியப்பை ஏற்படுத்தியது.