அறிதிறன்பேசிக்கு அடிமை ஆகலாமா?

மருத்துவர் பாலசாண்டில்யன்

- 

உங்கள் கணவர் அறிதிறன்பேசி, கணினி, இவற்றில் அதிக நேரம் செலவிடுகிறாரா? பெண்களே உஷார்! இன்றைய காலகட்டத்தில் உங்கள் கணவரின் கவனத்தைத் திருப்புவது சற்று சிரமம்தான். வீட்டில், வெளியில், உணவகங்களில், தொலைக்காட்சி பார்க்கும்போது, நாம் பேசும்போது, மணி அடித்தவுடன் கைப்பேசியை எடுக்கும் கணவர் அந்த அழைப்பை அல்லது ஒரு குறுஞ்செய்தியை மட்டும் பார்த்துவிட்டு மறுபடியும் உங்களுடன் மனதளவில் இருக்கிறாரா என்றால் இல்லை என்பதுதான் பதில். ஏனெனில், கைப்பேசியை கையில் எடுத்தவுடன் அடுத்தடுத்து அவர்கள் அதில் லயித்து தன்னிலை இழந்து விடுகிறார்கள் என்பதுதான் உண்மை.

உள்ளங்கை அளவில் ஒரு எதிரி என்றால் அது அறிதிறன்பேசிதான். நம்மை அவர் கவனிக்கவில்லை என்பதைவிட, நம்மை அவர் ஒதுக்கி வைத்து விட்டார் என்ற உணர்வு சில நேரம் தலைதூக்குகிறது.

சில நேரம் சில பெண்கள் கேட்கிறார்கள்? ‘நமக்குத் திருமணமாகிச் சிறிது காலங்கள்தான் ஆகியுள்ளன. இப்போதுதான் நமக்கு ஒரு குழந்தை பிறந்துள்ளது. எப்படிச் சிரிக்கிறது பாருங்கள்? அப்படி என்னதான் இந்தப் போனில் உள்ளது?’ என்று ஒரு உரையாடல் ஆரம்பிக்கிறது.

பதில்: இவ்வளவு நேரம் எனது பாஸ் உயிர் எடுத்தான். இப்போதுதான் உலகத்தில் என்ன நடக்கிறது; எனது நண்பர்கள் என்ன சொல்கிறார்கள்; செய்கிறார்கள் என்று கூடப் பார்க்க எனக்கு உரிமையா இல்லையா? நேற்று நமது திருமண நாள் புகைப்படத்தை முகநூலில் போட்டிருந்தேன். யார் என்ன சொல்லி வாழ்த்தியிருக்கிறார்கள் என்பதைப் பார்க்கிறேன்…

சில கணவர்கள் காதில் இப்படி விழுகிறது: ‘நீங்கள் பேசாமல் என்னைத் திருமணம் செய்து கொண்டதற்குப் பதில், இந்தப் போனை கட்டிக்கொண்டு இருக்கலாமே? என் உயிரை ஏன் எடுக்கிறீர்கள்?’