கற்றுக்கொள்வோம் எறும்புகளிடமிருந்து...!

இயற்கையில் எதுவுமே தன்னிச்சையாக இயங்குவதில்லை.

- பாறப்புறத் இராதாகிருஷ்ணன்

மனிதன் உள்பட அனைத்து உயிரினங்களும், மரம், செடி, கொடிகள் அனைத்துமே ஒன்றை ஒன்று சார்ந்துதான் இயங்குகின்றன. மரம் வெளியிடும் காற்றைத்தான் நாம் சுவாசிக்கிறோம். தாவரங்கள் தரும் உணவைத்தான் நாம் உண்கிறோம்.

நாம் ஆரோக்கியமாக இருக்க, தாவரங்கள் ஆரோக்கியமாக இருக்க வேண்டும். தாவரங்கள் ஆரோக்கியமாக இருக்க, மண் ஆரோக்கியமாக இருக்க வேண்டும். மண் ஆரோக்கியமாக இருக்க, அதற்குள் இருக்கிற நுண்ணுயிர்களும் ஆரோக்கியமாக இருக்க வேண்டும்.

இப்படி, இப்பூமியில் வாழும் அனைத்து உயிரினங்களும் ஒன்றையொன்று சார்ந்தவையாக உள்ளன. மிகப் பெரிய யானையாக இருந்தாலும், மிகச் சிறிய எறும்பாக இருந்தாலும் இயற்கையை ஆரோக்கியமாக வைப்பதில் ஒவ்வோர் உயிரினத்திற்கும் ஒரு முக்கியப் பங்கு உண்டு.

எளிதாகவும், இயல்பாகவும் நம்மிடையே பழகும் சிறு உயிரினம் எறும்பு. இந்தப் பூமிப்பந்தில், அனைத்து இடங்களிலும் உள்ள மிகச் சிறிய உயிரினமான எறும்பு, மனிதர்களுக்கு பல உண்மைகளைப் போதித்து வருகிறது. ஆனால், அவற்றை நாம் கவனிக்காமல் மிதித்து விட்டு கடந்து செல்கிறோம். இம்மண்ணில் எறும்புகள் 10 கோடி ஆண்டுகளுக்கு முன்பிருந்தே வாழ்ந்து வருகின்றன. டைனோசர்கள் வாழ்ந்த காலத்திலிருந்து எறும்புகள் இனம் இன்று வரை நம்மோடு பயணிக்கின்றன.

உலகில் மிகவும் பழைமை வாய்ந்த உயிரினம் எறும்புகள்.