'கடலும் கிழவனும்' அளித்த கௌரவம்...

ஏர்னஸ்ட் மில்லர் ஹெமிங்வே தனியொரு மனிதனாக, நாவலாசிரியராக, கலையழகும், நுணுக்கமும் நிரம்பிய இலக்கிய சிருஷ்டிகளின் கர்த்தாவாகவாக, கவிதை நிரம்பிய இலக்கியங்களைப் படைக்கும் பிரம்மாவாக மட்டுமல்லாமல், தானும் தனது சிருஷ்டிகளும் இணைந்துவிட்ட ஒரு பெரிய ஸ்தாபனமாகவே விளங்கினார். இவர் படைத்த 'கடலும் கிழவனும்' எனும் நாவல் நோபல் பரிசையும், புலிட்சர் விருதையும் பெற்றது.

- டி.எம்.இரத்தினவேல்

ஹெமிங்வே 1899- ஆண்டு ஜூலை 21-ஆம் தேதி அமெரிக்காவில், இல்லியனாய்ஸ் மாகாணத்தைச் சேர்ந்த ஒக்பார்க் என்கிற ஊரில் பிறந்தார். இவரது தந்தை கிராமப்புற மருத்துவராக இருந்தார். இளம்வயதில் ஹெமிங்வே கல்வி பயிலவில்லை.

தனது பதினெட்டாம் வயதில், முதல் உலகப் போரில் பங்கேற்றார். 1918-இல் செஞ்சிலுவைச் சங்க ஆம்புலன்ஸ் ஓட்டுநராகப் பணியில் சேர்ந்து, இத்தாலியப் போர்முனைக்குச் சென்றார். அங்கு யுத்த அனுபவங்களைப் பெற்றார். 1919-இல் இவர் அமெரிக்கா திரும்பினார்.

'எவே யு வில் நெவர் பி' என்ற இவரது முதல் நாவலின் கதாநாயகனான ‘நிக் ஆடம்ஸின்' சிருஷ்டி ஹெமிங்வேயின் யுத்த அனுபவத்தில் உருவானதாகும்.

1920 முதல் 1926 வரை பத்திரிகைத் துறையில் இருந்தார். சிகாகோவில் தனது இலக்கியக் குருவான ஷெர்வுட் ஆண்டர்சன் என்பவரைச் சந்தித்து, தம்மை மேம்படுத்திக் கொண்டார். பின்னர், கிரீஸ்துருக்கி இடையே நடைபெற்ற போரில் நிருபராகப் பணியாற்றினார். அப்போது நிறைய கதைகளை எழுதினார். இவரது ஆரம்பக் காலக் கதைகளில் 'யுத்தத்தின் வாசனை' வீசியது.

பின்னர், பாரிஸில் தங்கியபோது இலக்கியகர்த்தாவான ஜெட்ருட்ஸ்டெயின், எஸ்ரா பௌண்ட், போர்ட்ஸ்மாடாக்ஸ் போர்ட், ஜேம்ஸ் ஜாய்ஸ் போன்ற பிரபல எழுத்தாளர்களின் நட்பைப் பெற்றார். ஹெமிங்வேயின் வித்தியாசமான எழுத்தாற்றலுக்கு இவர்களே காரணமாகும்.

1923-இல் வெளியான இவரது 'மூன்று கதைகளும், பத்து கவிதைகளும்' என்ற நூல், 1924-இல் வெளியான 'நமது காலத்தில்' என்ற சிறுகதைத் தொகுதியும்தான் இவரது முதலிரண்டு வெளியீடுகளாகும். இரண்டும் சரியாக விற்பனையாகவில்லை.

1926-இல் இங்கிலாந்தில் வெளியான 'சூரியனும் உதயமாகிறான்' என்ற நாவல் இவருக்கு நல்ல வருவாயைத் தந்தது.