திருச்செந்தூர் கோயில் பெருந்திட்ட வளாகப் பணிகள் 2025-ஆம் ஆண்டு இறுதிக்குள் நிறைவு பெறும்

திருச்செந்தூர் அருள்மிகு சுப்பிரமணிய சுவாமி திருக்கோயிலில் பெருந்திட்ட வளாகப் பணிகள் 2025ஆம் ஆண்டு இறுதிக்குள் நிறைவுபெறும் என இந்து சமய அறநிலையத் துறை அமைச்சர் பி.கே.சேகர்பாபு தெரிவித்தார்.

- 

இத்திருக்கோயிலில், அமைச்சர் பி.கே.சேகர்பாபு செவ்வாய்க்கிழமை பிற்பகலில் சுவாமி தரிசனம் செய்தார். பின்னர் அவர், திருக்கோயிலில் நடைபெற்று வரும் பெருந்திட்ட வளாகப் பணிகளை பார்வையிட்டார்.

அப்போது அவர் செய்தியாளர்களிடம் கூறியதாவது:

இத்திருக்கோயிலில் நடைபெற்று வரும் பெருந்திட்ட வளாகப் பணியில், ஹெச்சிஎல் நிறுவனம் எடுத்துக் கொண்டுள்ள 20 பணிகளில் 3 பணிகள் முடிந்து திறப்பு விழா நடைபெற்றுள்ளது. ராஜகோபுர பணிகள் விரைவுபடுத்தப்பட்டு முடியும் தருவாயில் உள்ளது.

ஜன. 20ஆம் தேதி ஏழு கோபுரங்களுக்கு பாலாலயம் நடைபெற இருக்கிறது. புதிதாக ஏற்படுத்தப்பட்ட திட்டத்தின் படி 122 பக்தர்கள் தங்கும் அறைகள் கட்டப்பட இருக்கின்றன. மேலும் ஏ, பி பிரிவில் 56 பக்தர்கள் தங்கும் அறைகள் கட்டப்பட்டு வருகின்றன.