3 ஆண்டுகளில் நிரப்பப்பட்ட 18,460 மருத்துவப் பணியிடங்கள்

தமிழகத்தில் கடந்த மூன்று ஆண்டுகளில் மட்டும் 18,460 மருத்துவப் பணியிடங்கள் நிரப்பப்பட்டுள்ளதாக மக்கள் நல்வாழ்வுத் துறை அமைச்சர் மா.சுப்பிரமணியன் தெரிவித்தார்.

- 

சென்னை ராஜீவ் காந்தி அரசு மருத்துவமனையில் இன்னுயிர் காப்போம் - நம்மை காக்கும் 48 திட்டத்தின் கீழ் சிகிச்சை பெறும் மூன்று லட்சமாவது பயனாளியை நேரில் சந்தித்து அமைச்சர் மா.சுப்பிரமணியன் வியாழக்கிழமை நலம் விசாரித்தார்.

இந்நிகழ்வின்போது மக்கள் நல்வாழ்வுத் துறைச் செயலர் சுப்ரியா சாஹு, ராஜீவ் காந்தி மருத்துவமனை முதல்வர் டாக்டர் தேரணிராஜன் உள்ளிட்டோர் உடனிருந்தனர்.

அப்போது செய்தியாளர்களிடம் அமைச்சர் மா.சுப்பிரமணியன் கூறியதாவது: 'இன்னுயிர் காப்போம் - நம்மை காக்கும் 48' திட்டத்தின் கீழ் இதுவரை ரூ.261.46 கோடி செலவில் 3 லட்சம் உயிர்கள் காப்பாற்றப்பட்டுள்ளன. விபத்துக்குள்ளானவர்களுக்கு மருத்துவமனைகளில் கட்டணமின்றி 48 மணி நேரம் வரை வழங்கப்படும் ரூ.1 லட்சம் வரையிலான மருத்துவ சேவைகளை ரூ.2 லட்சமாக உயர்த்துவதற்கான பணி மேற்கொள்ளப்பட்டு வருகிறது.