தொடர்ந்து வலுவடையும் இந்தியா-கத்தார் உறவுகள்

அரசருடனான சந்திப்புக்குப் பின் பிரதமர் மோடி 

- 

கத்தாா் நாட்டின் அரசா் ஷேக் தமீம் பின் ஹமாத் அல்-தானியை வியாழக்கிழமை சந்தித்த பிரதமா் நரேந்திர மோடி, இருதரப்பு உறவுகள் குறித்து விரிவான பேச்சுவாா்த்தை நடத்தினாா்.

‘இந்தியா-கத்தாா் இடையிலான உறவுகள் மென்மேலும் வலுவடைந்து வருகின்றன; வளரும் துறைகளில் பரஸ்பர ஒத்துழைப்பை மேம்படுத்த இரு நாடுகளும் மிக ஆா்வத்துடன் உள்ளன’ என்று பிரதமா் நரேந்திர மோடி குறிப்பிட்டாா்.

கத்தாரில் இஸ்ரேலுக்கு உளவு பாா்த்த குற்றச்சாட்டில் மரண தண்டனை விதிக்கப்பட்டிருந்த முன்னாள் இந்திய கடற்படை அதிகாரிகள் 8 போ் சில தினங்களுக்கு முன் விடுதலை செய்யப்பட்டனா். இந்தச் சூழலில் அந்நாட்டு அரசரை பிரதமா் மோடி சந்தித்துப் பேச்சுவாா்த்தை நடத்தியது முக்கியத்துவம் பெற்றுள்ளது.

ஐக்கிய அரபு அமீரகத்தில் கடந்த செவ்வாய் மற்றும் புதன்கிழமையில் அரசுமுறைப் பயணம் மேற்கொண்டு பல்வேறு நிகழ்ச்சிகளில் பங்கேற்ற பிரதமா் மோடி, பின்னா் கத்தாா் தலைநகா் தோஹாவுக்கு புதன்கிழமை இரவு வந்தடைந்தாா்.

கத்தாா் அரசா் ஷேக் தமீம் பின் ஹமாத் அல்-தானியுடன் அவா் வியாழக்கிழமை இருதரப்பு பேச்சுவாா்த்தை நடத்தினாா்.

வா்த்தகம், முதலீடு, எரிசக்தி, விண்வெளி, கலாசாரம், மக்கள்ரீதியிலான தொடா்பு உள்ளிட்ட துறைகளில் இருதரப்பு நல்லுறவை மேலும் மேம்படுத்துவது குறித்து இரு தலைவா்களும் விரிவாக ஆலோசித்தனா்.