સૌરાષ્ટ્રમાં આજેય ધમધમે છે નાટકનું ફળિયું

તાળીનો ગડગડાટ થોડો ઘટ્યો છે, પણ નથી ઓસર્યો નાટ્યસંસ્કૃતિને જિવાડવાનો જુસ્સો.

- દેવેન્દ્ર જાની (રાજકોટ)

રંગભૂમિની ચર્ચા થાય ત્યારે પીઢ નાટ્યકર્મીઓ આ વાક્ય અચૂક ટાંકેઃ પાત્ર એવી ઉત્કટતાથી ભજવો કે પડદો પડી જાય પછીય પ્રેક્ષકગૃહમાં ૨ તાળીનો ગડગડાટ ગુંજતો રહે.

અત્યારે જો કે તાળીનો ગડગડાટ થોડો શમ્યો છે, પણ સાવ ગુંજતો બંધ પણ નથી થયો. હા, એક સમયે નાટક જોવા કાળા બજારમાં ટિકિટ લેતાં એવો સમય તો રહ્યો નથી. આમ છતાં કપરા કાળમાં નાટ્યસંસ્કૃતિને જિવાડવાનો જુસ્સો ઓસર્યો નથી.

સૌરાષ્ટ્ર-રાજકોટની વાત કરીએ તો અહીંની ભૂમિએ મનસુખભાઈ જોશી (આઈએનટી), જગદીશ દવે, રમેશ મહેતા, ગુલાબભાઈ શાહ, સુરેશ રાવલ, હીરાભાઈ ત્રિવેદી, ભરત યાજ્ઞિક, રેણુબહેન યાજ્ઞિક, કૌશિક સિંધવ, એલ.એસ. સૈયદ જેવાં દિગ્ગજ કલાકારોની ભેટ આપી છે.

એક સમયે રાજકોટમાં બાલભવન, રાજકુંવરબા લેડીઝ ક્લબ, રેલવે કમ્પાઉન્ડ થિયેટર, મેઘાણી રંગ ભવન જેવાં સ્થળોએ નિયમિત નાટકો યોજાતાં. પૃથ્વીરાજ કપૂર પણ રાજકોટના રેલવે કમ્પાઉન્ડ થિયેટરના મંચ પર આવી ચૂક્યા છે. લગભગ ત્રણ દાયકા પહેલાં મુંબઈનાં નાટકો રાજકોટ આવતાં ત્યારે નાટ્યરસિકો ટિકિટ માટે પડાપડી કરતા.