રાજકાજ

કુસ્તી સંઘનું સસ્પેન્શન અનિવાર્ય હતું

રમતગમતના ક્ષેત્રે વિવાદનો વિષય બની ગયેલ ભારતીય કુસ્તી સંઘના નવા ચૂંટાયેલા પ્રમુખ સંજય સિંહ અને તેમની સમગ્ર ટીમને સસ્પેન્ડ કરવાનો ખેલ મંત્રાલયનો નિર્ણય આવકાર્ય ગણાવવો જોઈએ. તેના કારણમાં સ૨કારે જણાવ્યું છે તેમ નવી ચૂંટાયેલી ટીમને અત્યંત ઉતાવળે નિયમોની વિરુદ્ધ જઈને કુસ્તી સંઘના કાર્યક્રમો અને ટૂર્નામેન્ટ યોજવાના નિર્ણય કર્યા હતા. આ નિર્ણયથી ખેલ મંત્રાલય તરત સક્રિય બન્યું. છેલ્લા ઘણા સમયથી રાષ્ટ્રીય અને આંતરરાષ્ટ્રીય સ્તરે ભારતીય કુસ્તી સંઘને કારણે ભારત શરમજનક સ્થિતિમાં મૂકાતું રહ્યું છે. કુસ્તી સંઘ અને દેશના પહેલવાનો વચ્ચે સર્જાયેલા વિવાદના સંદર્ભમાં પણ સરકારનો આકરો નિર્ણય અનિવાર્ય જણાયો છે. ખેલ મંત્રાલયે સ્વીકાર્યું છે કે નવી કારોબારી ના નિર્ણયો મનસ્વી હતા. વિવિધ સ્પર્ધાઓનાં આયોજનોની જાહેરાત પહેલાં પહેલવાનોને અગાઉથી સૂચના આપીને તૈયારી માટે સમય આપવો જોઈએ. ખેલ મંત્રાલયે આ વિવાદ ગંભીર સ્વરૂપ ધારણ કરે એ પહેલાં જ આકરો નિર્ણય લીધો તે યોગ્ય જણાય છે.