ഹാപ്പി ഡയാന

വ്യത്യസ്തമായ അവതരണ ശൈലികൊണ്ട് പ്രേക്ഷക ഹൃദയം കവർന്ന ഡയാന ഹമീദ് കൈനിറയെ സിനിമകളുമായി ബിഗ് സ്ക്രീനിലും സജീവമാവുകയാണ്...

- അങ്കിത കുറുപ്പ്

അഭിനയത്തിലേക്ക് വരുമെന്ന് സ്വപ്നത്തിൽ പോലും കരുതിയില്ല. എന്നാൽ ഞാൻ പോലും അറിയാതെ അങ്ങനെയൊരു ആഗ്രഹം എന്റെയുള്ളിൽ ജനിച്ചു. അത് എന്നോടൊപ്പം വളരുകയും ചെയ്തു... ചെറുതാണെങ്കിലും ഇന്ന് എന്നെ തേടിയെത്തിയ അവസരങ്ങളിൽ ഞാൻ വളരെയധികം സന്തോഷിക്കുന്നുണ്ട്. ഡയാന ഹമീദ് പറഞ്ഞുതുടങ്ങി...നല്ല ചിത്രങ്ങളുടെ ഭാഗമാകുക എന്നതിനൊപ്പം വലിയൊരു ആഗ്രഹവും ഡയാന മനസ്സിൽ ഒളിപ്പിച്ചിട്ടുണ്ട്.

 വ്യത്യസ്തമായ അവതരണ ശൈലിയിലൂടെ മലയാളി പ്രേക്ഷകരുടെ ഹൃദയത്തിൽ ഇടം നേടിയ ഡയാന ഇന്ന് ബിഗ് സ്ക്രീനിലും തന്റേതായ സാന്നിധ്യമറിയിച്ചിട്ടുണ്ട്.

ആങ്കറിങിൽ നിന്ന് സിനിമയിലേക്ക് 

തിരുവനന്തപുരം ജില്ലയിലെ മണക്കാടാണ് സ്വദേശം. പഠിക്കുന്ന സമയം മുതലേ ആങ്കറിങ് എന്റെ മനസ്സിൽ വേരുറപ്പിച്ചിരുന്നു. എന്നാൽ, അതൊരു പ്രഫഷനാക്കുമെന്ന് സ്വപ്നത്തിൽ പോലും വിചാരിച്ചില്ല. സ്കൂളിൽ പഠിക്കുമ്പോൾ ചെറുതായി ആങ്കറിങ് ചെയ്യുമായിരുന്നു. കോളജ് പഠനം കഴിഞ്ഞപ്പോൾ ഒരു പാർട്ട്ടൈം ജോലി പോലെ ഒരു സ്വകാര്യ ചാനലിൽ ഷോ ചെയ്തു. അതായിരുന്നു എന്റെ തുടക്കം. ആങ്കറിങ് മാത്രമല്ല, ഇന്ന് കാണുന്ന ഡയാനയുടെ തുടക്കവും അവിടെ നിന്നായിരുന്നു. കൂടാതെ കോളജ് പഠനകാലത്ത് മോഡലിങ്ങിലും സജീവമായിരുന്നു. അന്ന് കോളജ്തല മത്സരങ്ങളിൽ വിജയിച്ചിട്ടുമുണ്ട്.

2019ലാണ് ഗാംബ്ലർ എന്ന ആദ്യസിനിമ വരുന്നത്. സിനിമ ചെയ്യുന്നതിനുമുമ്പ് രണ്ട് മ്യൂസിക്കൽ വിഡിയോ ചെയ്തിരുന്നു. ആ ആൽബമാണ് സിനിമയിലേക്ക് അവസരം തുറന്നു തരുന്നത്. മെക്സിക്കൻ അപാരത എന്ന ചിത്രത്തിന്റെ സംവിധായകൻ ടോം ഇമ്മട്ടിയുടെ രണ്ടാമത്തെ ചിത്രമായിരുന്നു. മനസ്സിൽ അഭിനയത്തോട് ആഗ്രഹം ഉണ്ടായിരുന്നെങ്കിലും സിനിമയിലേക്ക് വരുമെന്ന് ഒരിക്കൽ പോലും വിചാരിച്ചില്ല. അത് സംഭവിച്ചു പോയതാണന്നാണ് ഞാൻ വിശ്വസിക്കുന്നത്. ഇപ്പോൾ ആ ഒഴുക്കിലൂടെ സഞ്ചരിക്കുന്നു.

ഫാമിലിയാണ് എല്ലാം