കൂട്ടുകൂടാം, കുടുംബത്തോട്

ഈ ആഘോഷക്കാലത്ത് മൊബൈൽ സന്ദേശങ്ങളായി ആശംസകൾ അയക്കുന്നതും വായിക്കുന്നതും ഒഴിവാക്കി ബന്ധുക്കളെയും സുഹൃത്തുക്കളെയും നേരിട്ടുകണ്ട് സന്തോഷം പങ്കിടാം. അങ്ങനെ അണുകുടുംബമായി നിലനിൽക്കെത്തന്നെ കൂട്ടുകുടുംബത്തിന്റെ രസവും സന്തോഷവും ഐക്വവും തിരിച്ചുപിടിക്കാം...

സമൂഹത്തിന്റെ മൂലക്കല്ലാണ് 'കുടുംബം', മനുഷ്യസമൂഹത്തിന്റെ നിലനിൽപുപോലും  കുടുംബമെന്ന സ്ഥാപനത്തിൽ അധിഷ്ഠിതമാണ്. കാലോചിതമായ മാറ്റങ്ങൾ മറ്റെന്തിലുമെന്നപോലെ കുടുംബത്തിന്റെ ഘടനയിലും ബന്ധങ്ങളിലും വന്നിട്ടുണ്ട്.

അടുത്ത കാലങ്ങളിലായി, പരമ്പരാഗത സങ്കൽപങ്ങളിലൂന്നിയ കുടുംബ വ്യവസ്ഥയിലേക്ക് ആധുനികതയുടെ രീതികളും മൂല്യങ്ങളും ഉൾച്ചേർന്നുള്ള ഒരു മാറ്റം വ്യക്തമാണ്. എന്നാൽ, ഈ മാറ്റങ്ങൾക്കിടയിലും കുടുംബത്തിന്റെ സ്ഥാനം സമൂഹത്തിൽ ഏറെ മുന്നിൽ തന്നെയാണ്.

കുടുംബം: സർവവ്യാപിയായ സ്ഥാപനം

 ഓരോ സമൂഹത്തിന്റെയും സ്വഭാവ സവിശേഷതകൾക്ക് അനുസരിച്ച് അതതിടങ്ങളിലെ കുടുംബ ഘടനയിലും മാറ്റങ്ങൾ ഉണ്ടാകും. ഭാര്യയും ഭർത്താവും പ്രായപൂർത്തിയെത്താത്ത മക്കളും മാത്രമടങ്ങുന്ന കുടുംബ വ്യവസ്ഥിതിയെ നമ്മൾ അണുകുടുംബമെന്ന് വിളിക്കുന്നു.

ഒരേ തലമുറയിൽ തന്നെ ഉൾപ്പെടുന്ന ഒന്നിലധികം കുടുംബ യൂനിറ്റുകൾ ഒന്നിച്ചുതാമസിക്കുന്ന സംവിധാനമാണ് എക്സ്റ്റൻഡഡ് കുടുംബം (Extended family). ഉദാഹരണത്തിന് ഭാര്യയുടെ സഹോദരരുടെ കുടുംബമോ ഭർത്താവിന്റെ സഹോദരരുടെ കുടുംബമോ അല്ലെങ്കിൽ ഒരു പുരുഷന്റെ തന്നെ ഒന്നിലധികം ഭാര്യമാരോ ഒന്നിച്ചു താമസിക്കുന്ന വ്യവസ്ഥയാണിത്.

മാതാപിതാക്കളും അവരുടെ മക്കളും പേരമക്കളും അടങ്ങുന്ന ഒന്നിലധികം തലമുറകൾ ഒരുമിച്ച് ഒരു വലിയ കുടുംബമായി താമസിക്കുന്നതാണ് കൂട്ടുകുടുംബം (Joint family). കൂട്ടു കുടുംബത്തിൽ നിന്ന് അണുകുടുംബത്തിലേക്ക് മാറുമ്പോൾ കുടുംബത്തിന്റെ സാമൂഹിക വ്യവഹാരങ്ങളിലും വ്യക്തികളുടെ ബന്ധങ്ങളിലും സ്വഭാവ രൂപവത്കരണ പ്രക്രിയയിലുമെല്ലാം കാര്യമായ മാറ്റങ്ങൾ സംഭവിക്കുന്നുണ്ട്.

കൂട്ടുകുടുംബത്തിൽനിന്ന് അണുകുടുംബത്തിലേക്ക്

വളരെ വേഗത്തിൽ നാഗരികവത്കരിക്കുന്ന ഒരു ആധുനിക സമൂഹത്തിന്റെ ഉപോൽപന്നമാണ് അണുകുടുംബം. അണുകുടുംബങ്ങൾ ഭാവിയിൽ ലോകത്തെല്ലായിടത്തും മേൽക്കൈ നേടുമെന്നത് പ്രശസ്തരായ സമൂഹ ശാസ്ത്രജ്ഞർ നേരത്തേതന്നെ പ്രതിപാദിച്ചിട്ടുണ്ട്.