വിജയ സേതുപതി

ജീവിതത്തിലും സിനിമയിലും സൂപ്പർഹിറ്റായി മാറിയ മക്കൾ സെൽവൻ വിജയ് സേതുപതിയെ അടുത്തറിയാം

- അജ്മൽ പഴേരി

മണ്ണിൽ നിന്നുയർന്ന് താരമായി മാറിയവരോട് തമിഴകത്തിനെന്നും ഒരിഷ്ടക്കൂടുതലുണ്ട്. അവരുടെ കഥകൾ കേൾക്കാനും പറയാനും മക്കൾക്കെന്നും ആവേശമാണ്. ജീവിതംകൊണ്ടും സിനിമകൊണ്ടും കോളിവുഡിനെ അമ്പരപ്പിച്ചവരുടെ പട്ടികയിൽ ഇന്ന് അവർ വിജയ് സേതുപതിയുടെ പേരും എഴുതിച്ചേർത്തിരി ക്കുന്നു.

ജൂനിയർ ആർട്ടിസ്റ്റായി തുടങ്ങി മക്കൾ സെൽവൻ എന്ന ബ്രാൻഡായി മാറിയ കഥ, സിനിമാക്കഥകളേക്കാൾ നാടകീയത നിറഞ്ഞതാണ്. അതിൽ ആക്ഷനും കോമഡിയും സെന്റിമെന്റ്സും റൊമാൻസുമൊക്കെയുണ്ട്.

ജീവിച്ച ജീവിതമാണോ അഭിനയിച്ച കഥാപാത്രങ്ങളാണോ അയാളെ കൂട്ടത്തിലൊരാളാക്കുതന്ന് ചോദിച്ചാൽ സംശയമാകും. വിജയ് സേതുപതി സിനിമയിലെന്നപോലെ പുറത്തും പ്രിയപ്പെട്ടവനാകുന്നു. ക്യാമറയ്ക്കു മുന്നിൽ പ്രകടനമികവിന്റെ അങ്ങേയറ്റമെങ്കിൽ ക്യാമറയ്ക്ക് പിന്നിൽ സ്വാഭാവികതയുടെ ആൾരൂപം. ആരുടെയും തോളിൽ കൈയിടാൻ മടിയില്ലാത്ത, ജീവിതത്തെക്കുറിച്ച് ഫിലോസഫിക്കലായി സംസാരിക്കുന്ന, പാസമുള്ള തമിഴൻ.

“അയാളെ കാണുമ്പോൾ എനിക്ക് വീട്ടിലെ പയ്യനെ പോലെ തോന്നും. എനിക്ക് മാത്രമല്ല, സിനിമ കാണുന്ന, അയാളെ അടുത്തറിയുന്ന ഏതൊരാൾക്കും അങ്ങനെയേ തോന്നൂ. നമ്മളിലൊരാളാണ് ആ രംഗം അഭിനയിക്കുന്നതെന്ന് സേതുപതിക്ക് മക്കൾ  സെൽവൻ എന്ന വിശേഷണം നൽകിയ സംവിധായകൻ സീനു രാമസ്വാമിയുടെ വാക്കുകളാണിത്. സെൽവം എന്ന് തമിഴിൽ പറഞ്ഞാൽ മലയാളത്തി മകൻ അല്ലെങ്കിൽ സ്വത്ത് എന്നാണ് അർഥം. സേതുപതി ജനങ്ങളുടെ സ്വത്താകുന്നു.

സിനിമയ്ക്കും സ്വത്താണ് സേതുപതി. ഒരുക്കിയെടുക്കാത്ത ശരീരം, അലസമായി തോന്നുന്ന ചലനങ്ങൾ, അടഞ്ഞ ശബ്ദത്തിൽ നിരയൊപ്പിച്ചുവരുന്ന തമിഴ് സ്വന്തമായൊരു സ്റ്റൈൽ ഇതിനോടകം നിർമിച്ചുകഴിഞ്ഞു. തിരഞ്ഞെടുത്ത സിനിമകളും ചെയ്ത കഥാപാത്രങ്ങളും അങ്ങനെ തന്നെ. "പിസയിലെ മൈക്കിൾ, ധർമദുരൈ, സൂപ്പർ ഡീലക്സി'ലെ ശിൽപ, വിക്രം വേദ’യിലെ വേദ, മാസ്റ്ററിലെ ഭവാനി, ‘വിക്ര'ത്തിലെ സന്ദനം... വൈവിധ്യങ്ങൾക്ക് എത്രവേണം ഉദാഹരണങ്ങൾ.