കരുതലോടെയാകാം വിദേശപഠനം

വിദേശത്തു പഠിക്കണമെന്ന ആഗ്രഹം മാത്രം പോരാ; അതിന് കുറഞ്ഞത് ഒരു വർഷത്തെയെങ്കിലും തയാറെടുപ്പ് ആവശ്യമാണ്. അക്കാദമിക് കാര്യത്തിൽ മാത്രമല്ല, താമസം മുതൽ കാലാവസ്ഥ വരെ അറിഞ്ഞിട്ടുവേണം പറക്കാൻ.

- എം.ടി. ഫരീദ

മികച്ച പഠനാവസരങ്ങൾ തേടി വിദേശത്തേക്കു പറക്കുന്ന വിദ്യാർഥികളുടെ എണ്ണം വർധിച്ചു വരികയാണ്. മുൻകാലങ്ങളിൽനിന്നു വ്യത്യസ്തമായി പ്ലസ് ടു കഴിയുന്നതോടെതന്നെ വിദേശത്തു പഠിക്കുന്നതിനെക്കുറിച്ചാണ് ഇപ്പോൾ കുട്ടികളും രക്ഷിതാക്കളും ചിന്തിക്കുന്നത്. അമേരിക്ക, യുകെ, ചൈന, റഷ്യ, ന്യൂസീലൻഡ്, കാനഡ, ഓസ്ട്രേലിയ, ജർമനി, സിംഗപ്പൂർ, ഫ്രാൻസ്, നെതർലൻഡ്സ് തുടങ്ങിയ രാജ്യങ്ങളെയാണ് ഇന്ത്യൻ വിദ്യാർഥികൾ ഉപരിപഠനത്തിനു കൂടുതൽ ആശ്രയിക്കുന്നത്. ഇറ്റലി, പോളണ്ട്, സ്പെയിൻ, നോർവേ, ജപ്പാൻ, മലേഷ്യ, സൗത്ത് കൊറിയ, ലിത്വാനിയ, തുർക്കി, മാൾട്ട, ലാത്വിയ, മൾഡോവ, യുഎഇ തുടങ്ങിയ രാജ്യങ്ങളും ഇന്ത്യൻ വിദ്യാർഥികളെ ആകർഷിക്കുന്നുണ്ട്.

എന്തുകൊണ്ടു വിദേശത്ത്?

ലോകോത്തര നിലവാരമുള്ള വിദ്യാഭ്യാസം, പ്രഗൽഭരായ അധ്യാപകർ, മെച്ചപ്പെട്ടതും അപ്ഡേറ്റഡുമായ സിലബസ്, ഫ്ലെക്സിബിൾ കരിക്കുലം, ഉയർന്ന പ്ലേസ്മെന്റ് സാധ്യതകൾ, നൂതന ഗവേഷണ സൗകര്യങ്ങൾ, പുതിയ കാഴ്ചപ്പാടുകൾ, വ്യത്യസ്ത ജീവിതരീതികൾ പരിചയപ്പെടാനും ഉൾക്കൊള്ളാനുമുള്ള അവസരങ്ങൾ, വിദേശ ഭാഷകൾ പഠിക്കാനും മികച്ച ആശയവിനിമയശേഷി ആർജിക്കാനുമുള്ള അവസരം, വ്യത്യസ്ത രാജ്യങ്ങളിലെ വിദ്യാർഥികളുമായുള്ള സൗഹൃദം, വിദേശത്തു സ്ഥിരതാമസത്തിനുള്ള സാധ്യതകൾ എന്നിങ്ങനെ വിവിധ ഘടകങ്ങൾ വിദേശ പഠനത്തെ ആകർഷകമാക്കുന്നു. കേവലം ബിരുദം ലഭിക്കുമെന്നതിലുപരി വ്യക്തിപരമായ വളർച്ചയുടെയും ആഗോള കാഴ്ചപ്പാടിന്റെയും വിശാലമായ ലോകമാണു വിദേശ വിദ്യാഭ്യാസം തുറന്നു തരുന്നത്.

തയാറെടുക്കണം, നേരത്തെ

കുറഞ്ഞത് ഒരു വർഷം മുമ്പെങ്കിലും വിദേശ പഠനത്തിനുള്ള തയാറെടുപ്പുകൾ ആരംഭിക്കേണ്ടതുണ്ട്. പ്ലസ് ടുവിനുശേഷം അണ്ടർ ഗ്രാജുവേഷനാണോ അതോ ഡിഗ്രിക്കു ശേഷം പോസ്റ്റ് ഗ്രാജുവേഷനാണോ വിദേശത്ത് പഠിക്കേണ്ടതെന്നു തീരുമാനിക്കണം. ഏറ്റവും താൽപര്യമുള്ള ഉപരിപഠനമേഖലയും ആ വിഷയത്തിൽ മികച്ച സ്ഥാപനങ്ങളുള്ള രാജ്യവും കണ്ടെത്തണം. പഠനത്തിനായി തിരഞ്ഞെടുക്കുന്ന രാജ്യത്തെ കാലാവസ്ഥ, ഭാഷ, തൊഴിൽ സാധ്യത, കുടിയേറ്റ നിയമങ്ങൾ, പഠനത്തിനും താമസത്തിനുമൊക്കെയുള്ള ചെലവ് തുടങ്ങിയ കാര്യങ്ങൾ സൂക്ഷ്മമായി വിശകലനം ചെയ്യണം.