"കാണാൻ കൊതിച്ച പാട്ടുകൾ

വെള്ളിത്തിരയിൽ കണ്ടു നിർവൃതിയടയാൻ ഭാഗ്യമുണ്ടാകാതെ സൂപ്പർഹിറ്റായി മാറിയ പാട്ടുകളെക്കുറിച്ചുള്ള ഓർമകൾ പങ്കിടുന്നു,

- രവി മേനോൻ

മറവിയുടെ മായാതീരങ്ങളിലൂടെ സഞ്ചരിക്കുമ്പോഴും ആ പാട്ടുണ്ടായിരുന്നിരിക്കണം, ഭാസ്കരൻ മാഷിന്റെ ഉപബോധ മനസ്സിൽ. "കാണാൻ കൊതിച്ച്' എന്ന സിനിമയുടെ സംവിധായകൻ സുകു മേനോനെ വല്ലപ്പോഴും കാണുമ്പോൾ പാട്ടിന്റെ പല്ലവി ഈണത്തിൽ മൂളും മാഷ്. എന്നിട്ടു പറയും. “ഈ പാട്ട് സിനിമയിൽ വന്നില്യ അല്ലേ? കഷ്ടായി. വളരെ ഇഷ്ടപ്പെട്ട് എഴുതിയതാണ്.''

ഭാസ്കരൻ മാഷ് ആദ്യം യാത്രയായി; പിറകെ സുകു മേനോനും. പക്ഷേ, സ്വപ്നങ്ങളൊക്കെയും പങ്കുവയ്ക്കാം...' എന്ന പാട്ട് ഇന്നും ജീവിക്കുന്നു; മറക്കാനാവാത്ത ഗാനവസന്തത്തിന്റെ നിത്യസ്മാരകമെന്നോണം.

സ്വന്തം രചനകളിൽ മാഷിന് ഏറ്റവും പ്രിയപ്പെട്ട ഗാനങ്ങളിൽ ഒന്നായിരുന്നു സ്വപ്നങ്ങളൊക്കെയും. എന്താണീ വരികളോട് ഇത്ര സ്നേഹമെന്ന്ഒരിക്കൽ ചോദിച്ചിട്ടുണ്ട് മാഷോട് ഹൃദ്യമായി ചിരിച്ചുകൊണ്ട് മാഷ് പറഞ്ഞു, “രണ്ടും ഒരേ നാണയത്തിന്റെ ഇരുപുറങ്ങളല്ലേ? സ്വപ്നവും ദുഃഖവും? സ്വാനുഭവത്തിൽ നിന്നെഴുതുമ്പോൾ കവിതകളോടും ഗാനങ്ങളോടും അൽപം സ്നേഹം കൂടും. ഈയിടെ ഈ പാട്ടിന്റെ ഇംഗ്ലിഷ് തർജമ ഒരാൾ അയച്ചു തന്നു. വായിച്ചു നോക്കിയപ്പോൾ കൊള്ളാം. ഈ ആശയത്തിന്റെ ഒരു സാർവജനീനത ഉണ്ടല്ലോ എന്നു തോന്നി...

ഷൂട്ടിങ് തുടങ്ങും മുൻപേ മൃതിയടഞ്ഞ കാണാൻ കൊതിച്ച്' എന്ന സിനിമയ്ക്കു റെക്കോർഡ് ചെയ്ത ആ ഗാനവുമായി ആത്മബന്ധം പുലർത്തുന്നവരെ ഇന്നും പതിവായി കണ്ടുമുട്ടാറുണ്ട് സംഗീതസംവിധായകൻ വിദ്യാധരൻ മാഷ്. അതു ചിട്ടപ്പെടുത്തിയതു ഞാനാണെന്നു പോലും പലർക്കും അറിയില്ല. പലരുടെയും ജീവിതത്തെ ആഴത്തിൽ സ്വാധീനിച്ച പാട്ടാണതെന്നു കേൾക്കുമ്പോൾ അദ്ഭുതം തോന്നും. പുറത്തിറങ്ങാതെ പോയ ഒരു സിനിമയിലെ പാട്ട്, മൂന്നു പതിറ്റാണ്ടിനു ശേഷവും ഒട്ടേറെ ഹൃദയങ്ങളിൽ ജീവിക്കുന്നു എന്നതു തന്നെ വലിയ അംഗീകാരം. ഭാസ്കരൻ മാഷെ മനസ്സാൽ അറിയാതെ നമിച്ചു പോകാറുണ്ടു ഞാൻ...' വിദ്യാധരൻ മാഷ് ശിരസ് കുനിക്കുന്നു.