നവസൗഹൃദം നവ്യാനുഭവം

'പത്രോസിന്റെ പടപ്പുകൾ' എന്ന സിനിമയിലെ അവസരം നൽകിയ സൗഹൃദം. രഞ്ജിതാമേനോനും അനഘ മരിയാ വർഗ്ഗീസും കടന്നുവന്ന വഴികളെക്കുറിച്ച് 'മഹിളാരത്നവുമായി പങ്കുവെച്ചപ്പോൾ...

- ബിന്ദു. പി.പി

സിനിമ നൽകുന്ന സന്തോഷം

 സാജൻ ബേക്കറിയിലെ മെറിനായി ശ്രദ്ധേയയായ രഞ്ജിതാമേനോന്റെ പുതിയ സിനിമാവിശേഷങ്ങൾ...

മോഡലിംഗ് വഴി പരസ്യചിത്രങ്ങളിലൂടെത്തുടക്കം കുറിച്ചപ്പോൾ രഞ്ജിതാമേനോൻ സിനിമ എന്ന വലിയ ലോകത്തെ കുറിച്ച് ഒരിക്കൽ പോലും ചിന്തിച്ചിട്ടില്ലായിരുന്നു. പരസ്യചിത്രങ്ങളിൽ അഭിനയിക്കുമ്പോഴും സിനിമയിൽ അഭിനയിക്കുന്ന വരെ കൗതുകത്തിൽ നോക്കിക്കണ്ടു. രഞ്ജിതയുടെ ഒരു പരസ്യ ചിത്രം കണ്ടായിരുന്നു. തമിഴ് സിനിമയിൽ നിന്ന് വിളി വരുന്നത്. അഭിനയത്തിന്റെ എ.ബി.സി.ഡി പോലും അറിയാതെ ജസ്റ്റ് ഒന്ന് ചെയ്തു നോക്കാമെന്ന മൈന്റിൽ തുടങ്ങിയ അഭിനയജീവിതമാണ് രഞ്ജിതയ്ക്കിപ്പോൾ ഏറ്റവും സന്തോഷവും സംതൃപ്തിയും നൽകുന്നത്. പത്രോസിന്റെ പടപ്പുകളെ പ്രേക്ഷകർ ഇരുകയ്യും നീട്ടി സ്വീകരിച്ച സന്തോഷത്തിലാണ് രഞ്ജിത.

പൊട്ടിച്ചിരിയുടെ പടപ്പുകൾ

ആദ്യ സിനിമ സാജൻ ബേക്കറിയിലെ ഒരു പാട്ട് കണ്ടാണ് ഡിനോയും സംവിധായകൻ അഫ്സലും എന്നെ പത്രോസിന്റെ പടപ്പുകളിലേക്ക് വിളിക്കുന്നത്. ആദ്യസിനിമയിൽ അജുച്ചേട്ടൻ, ലെനച്ചേച്ചി, ഗണേഷ് ഏട്ടൻ തുടങ്ങി ഒരുപാട് സീനിയർ ആർട്ടിസ്റ്റുമാർക്കൊപ്പം അഭിനയിക്കാൻ ഭാഗ്യം ലഭിച്ച ഒരാളാണ് ഞാൻ. അതുകൊണ്ടുതന്നെ രണ്ടാമതൊരു സിനിമ തെരഞ്ഞെടുക്കുമ്പോൾ നല്ലൊരു ടീമിനൊപ്പം നല്ലൊരു സിനിമയായിരിക്കണമെന്ന നിർബന്ധം ഉണ്ടായിരുന്നു. തണ്ണീർമത്തൻ ദിനങ്ങളെപ്പോലെയൊരു ഹിറ്റ് സിനിമയുടെ സഹ എഴുത്തുകാരനെന്ന നിലയിൽ ഡിനോയെ അറിയാമായിരുന്നു. അവർ ആദ്യം കോൺടാക്ട് ചെയ്തപ്പോൾ തന്നെ സ്ക്രിപ്റ്റ് കേൾക്കണമെന്ന് പറഞ്ഞിരുന്നു. കഥ കേട്ടപ്പോൾ ഫുൾ ഓൺ കോമഡി. കഥ കേൾക്കുമ്പോൾ തന്നെ ഒരുപാട് സീനുകളിൽ എനിക്ക് ചിരി കൺട്രോൾ ചെയ്യാൻ സാധിച്ചിരുന്നില്ല. അതുകൊണ്ട് തന്നെ ഇത് പ്രേക്ഷകർക്കും വർക്ക് ആവുമെന്ന് തോന്നിയിരുന്നു. ഹ്യൂമർ ചെയ്തു മറ്റുള്ളവരെ ചിരിപ്പിക്കാനാണ് ഏറ്റവും വിഷമം. ഇതിലെ കോമഡി എല്ലാവർക്കും വർക്കാവുമെന്ന കാര്യത്തിൽ ഉറപ്പുണ്ടായിരുന്നു. അങ്ങനെയാണ് അമ്മു എന്ന കഥാപാത്രം ചെയ്യാമെന്ന് തീരുമാനിക്കുന്നത്. ഡിനോയ് തന്നെയാണ് ടോണി എന്ന വേഷത്തിൽ അഭിനയിക്കുന്നത് എന്നറിഞ്ഞപ്പോൾ കൂടുതൽ കംഫർട്ട് ആയി. സിനിമ തീയേറ്ററിൽ കാണുമ്പോൾ ഒപ്പം ഇരിക്കുന്നവർ ചിരിക്കുന്നതും കയ്യടിക്കുന്നതുമൊക്കെ കാണുമ്പോൾ സന്തോഷം തോന്നി.

സാജൻ ബേക്കറി തന്ന ഭാഗ്യം