ദേവകിയമ്മയുടെ തപോവനം

നാലുപതിറ്റാണ്ടുകൊണ്ട് ആലപ്പുഴയിലെ അഞ്ചേക്കർ കൃഷിഭൂമിയിൽ മരങ്ങൾ നട്ട് കാടുണ്ടാക്കിയ ദേവകിയമ്മയുടെ കഥ...

- ഷിനില മാത്തോട്ടത്തിൽ

കൊലകൽ തറവാട്ടിൽ ദേവകിയമ്മയുണ്ടാക്കിയ തപോവനം ഒരു വാത്സല്യത്തുരുത്താണ്. സീതത്തോലി തോരണംകെട്ടിയ നക്ഷത്രമരങ്ങൾക്കും കൈതക്കാടുകൾക്കും തൊടിയിലെ പൂവരശിനും പുല്ലാഞ്ഞിക്കും ദേവകിയമ്മയുടെ വാത്സല്യത്തിന്റെ കഥ പറയാനുണ്ട്. വെള്ളത്താമരയും ആമ്പലും വിരിയുന്ന പാടങ്ങൾ. ശിഖരങ്ങളിൽ ലൈക്കണുകളെയും പന്നൽച്ചെടികളെയും തഴുകിവളർത്തി ആഡംബരത്തോടെ നിൽക്കുന്ന വൻമരങ്ങൾ നട്ടുപിടിപ്പിച്ച അപ്പൂപ്പൻ താടി... വൈവിധ്യമാർന്ന ഈ ജൈവസമൃദ്ധി അഞ്ചേക്കറിൽ പരന്നുകിടക്കുന്നു.

തറവാടിന്റെ പടിക്കലെത്തിയപ്പോൾ കമണ്ഡലുമരം കണ്ണിലുടക്കി. ഇളംപച്ചനിറത്തിൽ തുടുത്തുരുണ്ട കായ്കളുമായി അധികം ഉയരമില്ലാത്ത വൃക്ഷം. പണ്ടുകാ ലങ്ങളിൽ ഋഷിമാർ ഇതിന്റെ കായ്കളുടെ കാമ്പുകളഞ്ഞ് തൊണ്ടുകൊണ്ട് കമണ്ഡലു ഉണ്ടാക്കിയിരുന്നെന്നും ഈ മരത്തിന്റെ കമ്പാണ് അവരുടെ കൈയിലെ ദണ്ഡന്നുമാണ് കരുതപ്പെടുന്നത്. മൂന്നുകൊല്ലം കൊണ്ടാണ് ഞങ്ങൾക്കിത് കായ്ച്ചുകിട്ടിയത്, ദേവകിയമ്മയുടെ മൂത്ത മകളും തിരുവനന്തപുരം എൻജിനീയറിങ് കോളേജിലെ എൻവയോൺമെന്റൽ എൻജിനീയറിങ് വിഭാഗം മുൻ എച്ച്.ഒ.ഡി.യുമായ പ്രൊഫസർ തങ്കമണി ടീച്ചർ പറഞ്ഞു. കുഞ്ഞുങ്ങളെപ്പോലെ പരപാലിക്കുന്ന സസ്യജാലങ്ങളുടെ വിശേഷങ്ങൾ പറയാൻ എൺപത്തൊൻപതിലും ചുറുചുറുക്കോടെ ദേവകിയമ്മ പൂമുഖത്തിരുന്നു.

കൃഷിക്കാരിയമ്മ

 “തലമുറകളായി നെൽകൃഷിയായിരുന്നു ഞങ്ങൾക്ക് എനിക്കു മുകളിൽ ഏഴാങ്ങളമാരാണ്. ചേട്ടന്മാർക്കെല്ലാം ജോലിയുണ്ടായിരുന്നതിനാൽ ഞാനും അമ്മയും കൃഷി നോക്കിനടത്തി. അന്നൊക്കെ ഇവിടം നീണ്ടുകിടക്കുന്ന പാടമാണ്, നിറയെ തോടുകളും. എട്ടുകെട്ടിനോടു ചേർന്ന സ്ഥലം കച്ചിവിരിക്കാനും പാവിരിച്ച് കറ്റചവിട്ടി മെതിക്കാനുമുള്ള കളങ്ങളായിരുന്നു. 44 വർഷം മുൻപ് ഒരു കാറപകടത്തിൽപ്പെട്ട് ഞാൻ രണ്ടുകൊല്ലത്തോളം കിടപ്പിലായി. ആ സമയത്താണ് കൃഷി പതിയെ നിലച്ചത്. കളങ്ങൾ ഒഴിഞ്ഞുകിടന്നു. അവിടെയെല്ലാം മരങ്ങൾ നടാൻ ആലോചിക്കുന്നത് അപ്പോഴാണ്. വയ്യാതിരുന്നതിനാൽ നടന്നെത്താവുന്ന ദൂരത്തിൽ എന്തെങ്കിലുമൊക്കെ നടാൻ തുടങ്ങി, ദേവകിയമ്മയുടെ മനസ്സ് ആ ഓർമയിലേക്ക് പറന്നു. ചുമ്മാ കിടക്കുന്ന സ്ഥലമല്ലേ, എന്തേലും നടാമെന്നുതോന്നി യത് ഭൂമീദേവിയുടെ അനുഗ്രഹമായി ഈ അമ്മ കരുതുന്നു.

കിട്ടിയതെല്ലാം നട്ടു