മാന്ത്രികന്റെ പള്ളിയിൽ

കടമറ്റം എന്ന ദേശം ഇന്നറിയപ്പെടുന്നത് മാന്ത്രികനായ വൈദികന്റെ പേരിലാണ്, കടമറ്റത്ത് കത്തനാർ, കടമറ്റത്തച്ചൻ വികാരിയായിരുന്ന പള്ളിയും ജനിച്ചുവളർന്ന വീടും ഇന്ന് പ്രാർഥനാകേന്ദ്രങ്ങളാണ്

- REESHMA DAMODAR

കള്ളിമുൾച്ചെടികൾ നി റഞ്ഞ കുറ്റിക്കാട്, മാനം മുട്ടെ ഉയർന്നുനിൽക്കുന്ന കരിമ്പനകൾ..കള്ളിയങ്കാട്-പകൽ പോലും ആരും എത്തിനോക്കാൻ ഭയക്കുന്ന ഇടം. അവിടെ റാണിയായി വിലസുകയായിരുന്നു കള്ളിയങ്കാട്ട് നീലി. ആരെങ്കിലും ആ വഴി സഞ്ചരിച്ചാൽ, പിറ്റേന്ന് അവരുടെ പല്ലും നഖവും മാത്രമേ അവശേഷിക്കുകയുള്ളൂ. അവളെ തളയ്ക്കാൻ ചെന്നവരാരും, പിന്നെ ആ കാടിനു വെളിയിലേക്ക് വന്നില്ല. ഒന്നിനെയും കൂസാതെ ആ കാട്ടിൽ നീലി  ജീവിച്ചു. ഒടുവിൽ അവളെ തളയ്ക്കാൻ മധ്യതിരുവിതാം കൂറിൽ നിന്നൊരു കത്തനാരെത്തി കടമറ്റം പള്ളിയിലെ കത്തനാർ. കുട്ടിക്കാലത്ത് കേട്ട ഈ കഥകളിലെല്ലാം നായകൻ കടമറ്റത്ത് കത്തനാരായിരുന്നു.

കത്തനാരുടെ ആ പള്ളിയിലേക്കാണ് യാത്ര. മൂവാറ്റുപുഴയിൽ നിന്ന് 10 കിലോമീറ്റർ പിന്നിട്ടാൽ, വഴിയരികിൽത്തന്നെയാണ് കടമറ്റം സെന്റ് ജോർജ് ഓർത്തഡോക്സ് പള്ളി. പള്ളിപ്പെരുന്നാൾ കഴിഞ്ഞ ദിവസങ്ങളിലൊന്നിലാണ് അവിടെയെത്തുന്നത്. പെരുന്നാളിനോടനുബന്ധിച്ച് കെട്ടിയ സ്റ്റാളുകളെല്ലാം അഴിച്ചു മാറ്റുന്നതേയുള്ളൂ. കുറേ പടികൾ കടന്ന് പള്ളിമുറ്റത്തെത്തി. പള്ളിയോട് ചേർന്നുള്ള ചെറിയ മുറിയിൽ വികാരി ഫാദർ സണ്ണി വർഗീസ് ഇരിക്കുന്നു. തൊട്ടു മുന്നിലെ കസേരകളിൽ ഒരു അച്ഛനും മകനും ഇരിപ്പുണ്ട്. എന്തൊക്കെയോ വ്യഥകൾ അലട്ടുന്നുണ്ടെന്ന് അവരുടെ മുഖത്തു നിന്ന് വ്യക്തം. അച്ചൻ അവരോടു സംസാരിക്കുന്നതിനിടയിൽ പുറത്തിട്ട് കസേരകളിൽ ആളുകൾ വന്ന് ഊഴംകാത്തിരിപ്പായി.

ആ അച്ഛനും മകനും പുറത്തിറങ്ങി. മകന്റെ കൈപിടിച്ച് അച്ഛൻ പ്രാർഥനയോടെ പള്ളിയെ വലംവയ്ക്കാൻ തുടങ്ങി. അകത്തേക്ക് കടന്നു. അൾത്താര മുന്നിൽ ധ്യാനനിരതരായി കുറച്ചുപേർ. ഇടതുഭാഗത്തായി ഒരു പേടകം പോലെ കാണുന്നു. അതിനുമുന്നിൽ കുരിശുവെച്ചിട്ടുണ്ട്, രണ്ട് വലിയ തിരികളും. പലരും ആദരവോടെ അതിൽ തൊടുന്നു. “കടമറ്റത്തച്ചന്റെ കബറിടമാണ്, ഒരാൾ പറഞ്ഞുതന്നു.