ഓണമേളങ്ങളുടെ പല്ലശ്ശന....

ഓണത്തല്ല്, ഓണത്തപ്പൻ, ചെണ്ടക്കോൽ നിർമാണം, കത്തി നിർമാണം...നഷ്ടപ്പെട്ടു പോകുന്ന ഗ്രാമീണകാഴ്ചകളുടെ അവശേഷിക്കുന്ന തുരുത്താണ് പല്ലശ്ശന

ചാറ്റൽമഴ തൂവുന്നൊരു പകലിലാണ് പാലക്കാട്ടു നിന്ന് പല്ലശ്ശനയിലേക്കുള്ള യാത്ര തുടങ്ങുന്നത്. നഗരത്തിൽ നിന്ന് 20 കിലോമീറ്റർ അകലെയാണ് പല്ലശ്ശന എന്ന അസൽ പാലക്കാടൻ ഗ്രാമം. പച്ചപുതച്ച വയലേലകൾ, തലയുയർത്തി നിൽക്കുന്ന കരിമ്പനകൾ, അവയുടെ പശ്ചാത്തലത്തിൽ തലയെടുപ്പുള്ള ആനയെപ്പോലെ നിരയായി നിൽക്കുന്ന കരിമ്പാറക്കൂട്ടങ്ങൾ. ഇതിനെല്ലാം ഒത്തനടുവിലൂടെ നീളുന്ന പാത. വഴിയിലുടനീളം മനസ്സ് നിറയ്ക്കുന്ന കേരള ഗ്രാമീണത

പാലക്കാടൻ കൃഷിമേന്മയുടെ ജീവനാഡിയായ മലമ്പുഴ കനാൽ റോഡിനരികിൽ നമുക്ക് കൂട്ടുപോരും. ചിറ്റൂർ താലൂക്കിൽ നെല്ലിയാമ്പതി മലനിരകൾക്ക് വടക്കുഭാഗത്തായാണ് പല്ലശ്ശന സ്ഥിതിചെയ്യുന്നത്. പല്ലശ്ശന തല്ലുമന്ദമാണ് ഞങ്ങളുടെ ലക്ഷ്യം. പല്ലശ്ശനയുടെ സാംസ്കാരിക പൈതൃകം ബന്ധപ്പെട്ട് കിടക്കുന്നത് തല്ലുമന്ദം എന്ന് പൊക്കിൾക്കൊടിയോടാണ്. ഗ്രാമഹൃദയമാണ് തല്ലുമന്ദം. വില്ലേജ് ഓഫീസും ചന്തയും ചായക്കടകളുമെല്ലാം നിറഞ്ഞൊരു ഗ്രാമക്കവല. റോഡരികിലെ ഓടുമേഞ്ഞ വീടുകൾക്ക് മരക്കമ്പുകൾ കൊണ്ടുണ്ടാക്കിയ പാലക്കാടൻ സ്റ്റൈൽ വേലി ആരെയും ആകർഷിക്കും. വേലികളിൽ ചെടികൾ തളിർത്തും പൂത്തും നിറക്കൂട്ട് തീർക്കുന്നു. പഴയ മലബാറിന്റെ വാലറ്റമായി മുൻ തിരുകൊച്ചി സംസ്ഥാനത്തോട് ചേർന്നുകിടന്നിരുന്ന കാർഷിക പ്രാധാന്യമുള്ള പ്രദേശമായിരുന്നു പല്ലശ്ശന ഇന്നും കാർഷികപാരമ്പര്യത്തെ അതുപോലെ നെഞ്ചോട് ചേർത്തു വെച്ചിട്ടുണ്ട് ഈ ഗ്രാമം.

തല്ലു മന്ദത്തെ ഓണത്തല്ല്...

തല്ലുമന്ദത്തിലെത്തിയാൽ ആദ്യം അറിയുക തല്ലിന്റെ കഥയാണ്. തിരുവോണ ദിനത്തിലും അവിട്ടദിനത്തിലും ഓണാഘോഷത്തോട് അനുബന്ധിച്ച് നടക്കുന്ന ഓണത്തല്ലിനാണ് പല്ലശ്ശനയിലേക്ക് കൂടുതൽ ആളുകൾ വിരുന്നെത്തുക. തല്ലുമന്ദത്തിലും തൊട്ടടുത്ത് തന്നെയുള്ള വേട്ടയ്ക്കൊരുമകൻ ക്ഷേത്രത്തിലുമായാണ് ഓണത്തല്ല് അരങ്ങേറുക. പോരാട്ടവീര്യത്തിന്റെ പ്രൗഢി വിളിച്ചോതുന്ന ഐതിഹ്യപ്പെരുമ ഈ ഓണത്തല്ലിന് പിന്നിലുണ്ട്. കോഴിക്കോട് സാമൂതിരിയുടെ സാമന്തന്മാരായിരുന്നു പല്ലശ്ശന കുറൂർ നമ്പിടി. ഇദ്ദേഹത്തെ യുദ്ധത്തിൽ കുതിരവെട്ടത്തുനായർ ചതിച്ച് കൊന്നു. ഇതറിഞ്ഞ പല്ലശ്ശന ദേശവാസികൾ ശത്രുവിനെ പോർവിളിച്ചതിന്റെ ഓർമപുതുക്കലായാണ് ഓണത്തല്ല് അരങ്ങേറുന്നത്.