മഴമല

മലയിറങ്ങി മഴ താഴ്വര തൊടുന്ന ചുരക്കാഴ്ച കണ്ട് വയനാടൻ മലകളിലേയ്ക്ക്... പച്ച പുതച്ച ഗ്രാമവഴികളിലൂടെ, തേയിലത്തോട്ടങ്ങളിലൂടെ, ചെളിപ്പന്തുകളി തിമിർക്കുന്ന പാടങ്ങളിലൂടെ ഒരു മഴയാത്ര

- Arun P Gopi

ചെമ്പ്രമലയുടെ താഴ്വാരത്ത് കോടമഞ്ഞ് പുതഞ്ഞിരുന്നു. വയനാടൻ ചുരം കയറുമ്പോൾ പശ്ചിമഘട്ടത്തിന്റെ മുഴുവൻ സൗന്ദര്യവും നമുക്ക് മുന്നിൽ അനാവൃതമാകുന്നു. അനിർവചനീയമായ ഈ പ്രകൃതിഭംഗി ആസ്വദിക്കാത്തവരായി ആരുണ്ട്. കോട പുതച്ചുനിൽക്കുന്ന കുന്നുകൾ. ഹരിതാഭയാർന്ന താഴ്വരകൾ. ഇളം ചാറ്റലിൽ തുടങ്ങി പൊടുന്നനെ രൗദ്രതാളമാർന്ന് അപ്രത്യക്ഷമാകുന്ന മഴവീഴ്ത്തിയ വെള്ളപ്പാടുകൾക്കു മീതെ നിമിഷാർധംകൊണ്ട് വെയിൽ സ്വർണപ്പൊടി തൂവുന്നതും കാണാം. ഓരോ നിമിഷവും മാറിമറിയുന്ന പ്രകൃതിയുടെ ഭാവങ്ങൾ. ചുരത്തിന്റെ ഒമ്പതാം വളവിൽ നിന്ന് താഴേക്കു നോക്കിയാൽ മലമടക്കുകളിൽ നിന്ന് മഞ്ഞവെളിച്ചം പൊഴിച്ച് ഏന്തിവലിഞ്ഞെത്തുന്ന കെ.എ സ്.ആർ.ടി.സി ബസ്സുകൾ കാണാം. മഴ നനഞ്ഞ് പ്രകൃതിഭംഗി ക്യാമറയിൽ പകർത്താനെത്തുന്നവരും കുറവല്ല. മഴ ശക്തിയാർജിച്ചിരുന്നു. ചുരം കയറി വയനാട്ടിലേക്ക് പ്രവേശിച്ചു. കരിന്തണ്ടന്റെ കഥപറയുന്ന ചങ്ങലമരവും ലക്കിടിയും പിന്നിട്ടാൽ കിഴക്ക് ചെമ്പ്രമലയിൽ കോടമഞ്ഞ് മൂടിയ സുന്ദരദൃശ്യം കാണാം. വൈത്തിരിയുടെ കിഴക്ക് ചെമ്പ്രമലയും പടിഞ്ഞാറ് ബാണാസുര മലനിരകളുമാണ്. ചുരം കയറി വയനാടൻ കുന്നുകളിലൂടെയും ഗ്രാമങ്ങളിലൂടെയുമുള്ള മഴയാത്രയായിരുന്നു ലക്ഷ്യം.

മഴയത്തൊരു കട്ടനടിക്കാം

ബാണാസുര മലനിരകളിലാണ് വിശാലമായ തേയില ത്തോട്ടങ്ങൾ. വൈത്തിരിയിൽ നിന്ന് പൊഴുതനയിലേക്ക് പോകുമ്പോൾ ഈ മലനിരകൾ കൂടുതൽ വ്യക്തമായി കാണാം. ആ വഴിക്കുള്ള ഹാരിസണിന്റെ അച്ചൂർ എസ്റ്റേറ്റിലെ ടീ മ്യൂസിയത്തിൽ നല്ല കട്ടൻ കിട്ടുമെന്ന് കേട്ടിരുന്നു. ഇടയ്ക്ക് ശക്തിയാർജിച്ചും പിന്നാലെ നൂൽമഴയായും പെയ്യുന്ന വയനാടൻ മൺസൂൺ ആസ്വദിച്ചുള്ള യാത്ര മറക്കാനാകില്ല. കനത്ത മഴയെ വകവെയ്ക്കാതെ കുന്നിൻചെരുവുകളിൽ തേയിലനുള്ളുന്ന സ്ത്രീകളുടെ വിദൂരദൃശ്യം.

അച്ചൂർ എസ്റ്റേറ്റിന്റെ ഉച്ചിയിൽ കയറിയാൽ പശ്ചിമഘട്ട മലനിരകളുടെ സുന്ദരകാഴ്ച കാണാം. മഴ മാറിയാൽ പൊടുന്നനെയെത്തുന്ന കോടമഞ്ഞും അസ്ഥിതുളയ്ക്കുന്ന കൊടുംതണുപ്പും കിടുകിടാ വിറപ്പിക്കും. അച്ചൂർ എസ്റ്റേറ്റിലെ ടീ മ്യൂസിയമായിരുന്നു പിന്നീടുള്ള ലക്ഷ്യം. യൂറോപ്യൻ മാതൃകയിൽ മരങ്ങൾ കൊണ്ട് നിർമിച്ച് മൂന്നുനില കെട്ടിടമാണ് ടീ മ്യൂസിയം. അകത്തേയ്ക്ക് പ്രവേശിക്കുമ്പോൾ തേയിലപ്പൊടിയുടെ ഗന്ധം നാസാരന്ധങ്ങളെ തഴുകും.