వేదం బెవ్వని వెదకెడిని...

వేదాలు ఆయనే... వేదాంగాలూ ఆయనే! వేదాలు వినుతించేదీ ఆయననే... వేదాంగాలు వర్ణించేదీ ఆయననే!

- - శ్రీమతి బి. కృష్ణకుమారి

అన్నమయ్య పదామృతం

వేదం బెవ్వని వెదకెడిని ఆ దేవుని కొనియాడుడీ ॥

అలరిన చైతన్యాత్మకుఁ డెవ్వడు కలడెవ్వఁడెచట కలఁడనిన తలతు రెవ్వనిని తను వియోగదశ యిల నాతని భజియించుడీ॥ 

కడగి సకల రక్షకుడిందెవ్వడు వడి నింతయు నెవ్వనిమయము పిడికిట తృప్తులు పితరులెవ్వనిని తడవిన ఘనుడాతని కనుడీ ॥

కదిసి సకల లోకంబుల వారలు యిదివో కొలిచెద రెవ్వనిని త్రిదశ వంద్యుడగు తిరువేంకటపతి వెదకి వెదకి సేవించుడీ॥

వేదాలు ఆయనే... వేదాంగాలూ ఆయనే! వేదాలు వినుతించేదీ ఆయననే... వేదాంగాలు వర్ణించేదీ ఆయననే! ఆ వేదస్వరూపుడు, ఆ వేదవినుతుడు సకల జీవుల్లో చైతన్యాత్మకుడు. సర్వకాలాల్లో సంరక్షించే సర్వేశ్వరుడు. అందుకే ఆ దేవదేవుడిని కొనియాడి, ఆ దినకరతేజుడిని భజించి, ఆ ఘనాఘన సుందరుడిని సేవించి ఆయనలో ఐక్యం కావటమే మన కర్తవ్యం.

ఆ కర్తవ్యాన్ని క్షణం కూడా విస్మరించకుండా భగవదర్పితంగా బ్రతికేవారే భాగవతోత్తములు. వారికి దైవస్మరణ, దైవసేవే దినచర్య. ఆ స్మరణతో, ఆ సేవతో ఆ భక్తశిఖామణులు ఆ భక్తిమార్గంలో వసివాడని పూలదారులు పరుస్తారు. అలా ఆ తోవలో పూలదారులే కాదు పదామృతధారల్ని కూడా.ప్రవహింపజేసిన పదకవితా పితామహుడు అన్నమాచార్య.ఆయన సంకీర్తనలతో ఆ సప్తగిరీశుడి వైభవం వీనులవిందుగా విశ్వమంతా వ్యాపించింది. ఆయన పాటల్లో శ్రీనివాసుడి శోభ పసిడికాంతులతో విరాజిల్లింది. అలాంటి అరుదైన పదామృతమే ఈ 'వేదం బెవ్వని వెదకెడిని...' కీర్తన. ఆ కొండలరాయడిని ఎందుకు కొనియాడాలో, ఆ భక్తవరదుడిని ఎందుకు భజించాలో, ఆ కామితఫలదాతను ఎందుకు కనులారా వీక్షించాలో, ఆ శ్రీముద్రాంకితుడిని వెదకి వెదకి మరీ ఎందుకు సేవించాలో సంకీర్తనాచార్యుడు ఈ పాటలో ప్రస్ఫుటం చేశాడు. ముఖ్యంగా వేంకటాచలపతిని వేదాలకు సైతం అందని పరిపూర్ణ జ్ఞానస్వరూపుడిగా ఈ కీర్తనలో అన్నమయ్య ప్రస్తుతించాడు. వేదాలు అన్వేషించే అనుపమాన రూపంగా అర్చించాడు. అందుకే "భగవంతుడు వేదాలకు అతీతుడు. వేదవేదాంగాలను అధ్యయనం చేసినంత మాత్రాన ఆయనను పొందలేం. అవన్నీ ఆయన వైపు వెళ్ళేందుకు సూచనలు మాత్రమే! ఆ వేదమార్గంలో మనం పయనించినప్పుడే పరమాత్మ అర్థమవుతాడు" అన్నారు భగవాన్ శ్రీరామకృష్ణ పరమహంస.

ఆ దేవుని కొనియాడు....