ఆ మౌక్తికం కోసమే అంతులేని అగాధంలోకి...

అపురూపమైంది ఆ ఆణిముత్యం. అగాధమే దాని ఆవాసం.అలలపై అన్వేషించినంత కాలం అది అలభ్యం. కడలిపై నావలో విహరించి, విహరించి కాలం వృథాగా గడిచిపోయింది.

- చైతన్య

అపురూపమైంది ఆ ఆణిముత్యం. అగాధమే దాని ఆవాసం.అలలపై అన్వేషించినంత కాలం అది అలభ్యం. కడలిపై నావలో విహరించి, విహరించి కాలం వృథాగా గడిచిపోయింది. ఆ కల్లోలాలతో నౌక కూడా శిథిలమైపోయింది. ఇక ఆ పాత ఓడను ఒదిలి ఒంటరిగా పయోనిధిలోకి మునక తప్పదు. అవిశ్రాంతంగా ఆ అనంత జలధిలో అన్వేషిస్తే ఆ మౌక్తికం దక్కకపోదు.

ఆధ్యాత్మిక అన్వేషకులకు ఆ అంతర్యామి సాన్నిధ్యమే మనోహరమైన ముత్యం.ఆ మౌక్తికం కోసం మునిగే అగాధ జలాశయమే ఈ అనంతమైన విశ్వం. ఆ ఆణిముత్యాన్ని అందుకోవాలని అధ్యాత్మ పిపాసులు తీరాలపైనే కాదు, విహరించే నావపై కూడా వ్యామోహాన్ని వదులుకునేందుకు సిద్ధపడతారు. అమృతమయమైన ఆ ముక్తామణి కోసం మహోదధిలో మునకకూ సంసిద్ధులవుతారు. అలాంటి ఆధ్యాత్మిక అన్వేషణకే అక్షరరూపమిస్తూ రవీంద్రుడు తమ 'గీతాంజలి' కావ్యంలో...