RTEમાં બીજા રાઉન્ડમાં વધુ 4966 વિદ્યાર્થીઓને પ્રવેશ ફાળવી દેવાયા

બીજા રાઉન્ડના પ્રવેશ જાહેર કરાયા બાદ RTEની 30127 બેઠક ખાલી પડી પ્રથમ રાઉન્ડમાં પ્રવેશ મેળવેલા 48890 વિદ્યાર્થી પૈકી બોગસ ડોક્યુમેન્ટથી દાખલ થયેલા 1130ના પ્રવેશ રદ

રાઈટ ટુ એજ્યુકેશનએક્ટ અંતર્ગત પ્રવેશના બીજા રાઉન્ડમાં 4966 જેટલા વિદ્યાર્થીઓને પ્રવેશ ફાળવવામાં આવ્યો છે. બીજા રાઉન્ડમાં પ્રવેશ મળ્યો હોય તેવા વિદ્યાર્થીઓએ 5 જૂન સુધીમાં સ્કૂલમાં જઈને પ્રવેશ કન્ફર્મ કરાવવા ના રહેશે. પ્રથમ રાઉન્ડમાં 48 હજાર કરતા વધુ વિદ્યાર્થીઓને પ્રવેશ ફાળવાયા હતા. જોકે, તે પૈકી 1130 વિદ્યાર્થીઓના પ્રવેશ રદ કરાયા હતા. બીજા રાઉન્ડની ફાળવણી બાદ રાજ્યમાં RTEની 30127 બેઠકો ખાલી રહેવા પામી છે. આ વખતે ખૂબ જ મોટી સંખ્યામાં બેઠકો ખાલી રહી છે. જેમાં સૌથી વધુ ગુજરાતી માધ્યમની 14 હજાર કરતા વધુ અને અંગ્રેજી માધ્યમ ની 12 હજાર કરતા વધુ બેઠકો ખાલી છે.