பெருந்தோட்ட தொழிலாளர்களுக்கான அடிப்படை சம்பளம் ரூ.1,350

“வழக்குகள் வாபஸ்"

பெருந்தோட்ட தொழிலாளர்களின் வேதன அதிகரிப்பு தொடர்பில் தொடரப்பட்ட அனைத்து வழக்குகளும் வாபஸ் பெறப்படும் என்று தொழில் இராஜாங்க அமைச்சர் வடிவேல் சுரேஷ் தெரிவித்துள்ளார்.

தொழில் திணைக்களத்தில் செவ்வாய்க்கிழமை (10) நடைபெற்ற வேதன நிர்ணயசபை பேச்சுவார்த்தையை தொடர்ந்து நடத்தப்பட்ட ஊடக சந்திப்பிலேயே அவர் மேற்கண்டவாறு கருத்துரைத்தார்.

தொடர்ந்து கருத்துரைத்த அவர், தொழில் அமைச்சில் பெருந்தோட்ட தொழிலாளர்களின் வேதன அதிகரிப்பு தொடர்பில் சம்பள நிர்ணய சபை இன்றைய தினம் (செவ்வாய்க்கிழமை) கூடியது.

பல வாத விவாதங்கள் பல வர்த்தமானிகள் பல வழக்குகள் என நீண்டு கொண்டு சென்ற பெருந்தோட்டத் தொழிலாளர்களின் வேதன அதிகரிப்பு தொடர்பிலான இழுபறி நிலைமைக்கு முற்றுப்புள்ளி பெறப்பட்டுள்ளது.

அரசாங்கமும் தொழில் அமைச்சும் சம்பள நிர்ணய சபையும் ஒன்றிணைந்து அடிப்படை சம்பளத்தை உறுதி செய்ய வேண்டிய தார்மீக பொறுப்பு உள்ளது.

அடிப்படை சம்பளம் 1,350 ரூபாய் ஊழியர் சேமலாப நிதி ஊழியர் நம்பிக்கை நிதி சேவைக்கால கொடுப்பனவு என்பன 1,350 ரூபாய் அடிப்படை சம்பளத்திற்கே வழங்கப்படும். epf/etf 15 சதவீதம் தொழில் தருநர்களினால் வழங்கப்படும் அதனையும் ஒன்று சேர்த்தால் ஒரு நாள் தொழிலுக்குச் செல்லும் பெருந்தோட்ட தொழிலாளர் ஒருவருக்கு 1,552 ரூபாய் கொடுப்பனவு வழங்கப்படும் . இன்றிலிருந்து இதனை நடைமுறைப்படுத்த விசேட வர்த்தமானி வெளியிடப்படும் என்றார்.