બે દિવસ સુધી રાહત માણી લોઃ ફરીથી બે કડકડતી ઠંડીનો નવો રાઉન્ડ શરૂ થશે

આ સપ્તાહે ગુજરાતના વાતાવરણમાં મોટા ફેરફારો જોવા મળે તેવી શક્યતાઃ નલિયામાં ૧૦.૫ ડિગ્રી ઠંડી નોંધાઈ

અમદાવાદ સહિત રાજ્યભરમાં કાતિલ ઠંડી પડ્યા બાદ પવનની દિશા બદલાતાં હાલ ઠંડીમાં થોડી રાહત મળી છે. રાજ્યના અનેક વિસ્તારના લઘુતમ અને મહત્તમ તાપમાનમાં વધારો થયો છે.

ગુજરાતમાં ઉત્તર અને ઉત્તર-પૂર્વ દિશા તરફથી પવનો ફૂંકાઈ રહ્યા હતા તેના બદલે હવે પવનની દિશા બદલાઈને પૂર્વથી દક્ષિણ પૂર્વ તરફ થઈ છે. ઠંડીમાં મળેલી આ રાહત જોકે હવે ફક્ત બે દિવસની મહેમાન છે તેવું સ્થાનિક હવામાન વિભાગ અને હવામાન નિષ્ણાતોએ તેમની આગાહી માં સ્પષ્ટ જણાવ્યું છે. બે દિવસ બાદ એટલે કે ૨૨ જાન્યુઆરીથી કડકડતી ઠંડીનો નવો રાઉન્ડ શરૂ થશે, જે લોકોને ભારે પરેશાન કરી દેશે. હવામાન નિષ્ણાતોની આગાહી અનુસાર આગામી દિવસોમાં ગુજરાતના હવામાનમાં મોટો પલટો જોવા મળી શકે છે. તેમણે ભારે ઠંડી સાથે માવઠાની પણ આગાહી કરી છે, જેથી ગુજરાતીઓને હવે ભરશિયાળે વરસાદનો માર સહન કરવા માટે પણ તૈયાર રહેવું પડશે.