ગુનાખોરી રોકવા વટવા, મણિનગર અને અસારવા રેલવે સ્ટેશનમાં પોલીસકર્મીઓને ડાઈવર્ટ કરાયા

કાલુપુર રેલવે સ્ટેશન નવીનીકરણના કારણે બંધ થતાં ટ્રેનોને ત્રણ રેલવે સ્ટેશન તરફ વળાઈ ગુનેગારો ત્રણેય રેલવે સ્ટેશનને ગઢ બનાવે નહીં તે માટે પોલીસનો એક્શન પ્લાન તૈયાર

ગુનેગારોનો ગઢ બની ગયેલા ગુજરાતના સૌથી મોટા કાલુપુર રેલવે સ્ટેશનનું નવીનીકરણ કરવામાં આવી રહ્યું છે, જેના પગલે મોટા ભાગની ટ્રેનો વટવા, મણિનગર, અસારવા ડાઈવર્ટ કરવામાં આવી છે. હવે ગુનેગારો વટવા, મણિનગર અને અસારવા રેલવે સ્ટેશનને પોતાનો અડ્ડો બનાવી લે તે પહેલાં જ પોલીસે પોતાનું સામ્રાજ્ય જમાવી લીધું છે. કાલુપુર રેલવે સ્ટેશન પર તહેનાત તમામ પોલીસ કર્મચારીઓને વટવા, મણિનગર, અસારવા રેલવે સ્ટેશન પર ડ્યૂટી ફાળવી દીધી છે. પોલીસનો આ એક્શન પ્લાન કેટલો સફળ થશે તે આવનારા દિવસમાં ખબર પડશે, પરંતુ હાલ તમામ ગુનાખોરીને રોકવા માટે કમર કસવામાં આવી રહી છે.